Родителите понекогаш имаат вистински маки со деца кои се пребирливи и одбиваат да јадат поголем дел од храната што им се нуди. Еден експерт тврди дека една реченица може да помогне во вакви ситуации.

Колку пати со многу љубов сте подготвиле оброк за вашето дете, само за тоа да го погледне и да каже: „Не сакам“, „Не го јадам тоа“. Сите знаеме колку може да ве изнервира тоа, особено кога се трудите да им понудите здрава и нутритивно богата храна.

Но, според зборовите на еден експерт за детска исхрана, молењето, наговарањето или присилувањето не се решение. Наместо тоа, постои фраза што може да направи голема разлика. Касиди Андерсон, мајка на две деца и терапевт, ја сподели фразата што ја користи со своите деца и клиенти: „Не мораш да го јадеш тоа“.

Зошто оваа фраза е важна?

Касиди тврди дека присилувањето на детето да проба храна никогаш нема да доведе до тоа да ја засака. Напротив, тоа често може да има спротивен ефект.

– Борбата со детето само уште повеќе ќе го оддалечи од храната. Кога му даваме на детето слобода на избор, поголема е веројатноста со текот на времето да ја прифати храната – објаснува Касиди.

Наместо присилување, Касиди препорачува да му речете: „Не мораш да јадеш, но сите заедно ќе седиме на маса“. Или: „Не мораш да јадеш, но следниот оброк или ужина ќе биде дури по еден час“.

Овие реченици му даваат на детето чувство на контрола, а истовремено поставуваат јасни граници. Исто така, Касиди советува да ги зголемите шансите детето да ја проба храната така што ќе му дозволите да ја допре, да ја помириса, да си игра со неа или да земе мали залаци.

Што да избегнувате

Касиди нагласува дека е важно да не го условувате детето со десерт. Таквиот пристап може да доведе до нездрав однос кон храната и дополнително да ја засили „борбата за моќ“ што родителите сакаат да ја избегнат.

Иако резултатите нема да се видат веднаш, Касиди ги уверува родителите дека со текот на времето овој пристап ќе донесе позитивни промени.

Извор