Можеме ли да го намалиме разболувањето на децата во градинка и училиште?
Враќањето во детските колективи секоја есен носи познато сценарио, кашлање, течење на носот, покачена температура и чести отсуства. За децата на претшколска возраст, честите вирусни инфекции се очекувани бидејќи тие од еден вирус влегуваат во друг.
Целта на превенцијата не е целосно да се избегне секој вирус, туку да се создадат услови за силен имунолошки систем и побрзо закрепнување.
Основни столбови за зајакнување на детскиот имунитет
Според Светската здравствена организација, способноста на организмот да се одбрани е поважна од самата изложеност на вирусот. Еве ги основните навики што ја градат детската отпорност:
- Квалитетен сон: За деца до 5 години не се препорачува заспивање по 21:00 часот. На децата од претшколска и рана училишна возраст им се потребни минимум 8 до 10 часа непрекинат сон.
- Разновидна исхрана и хидратација: Исхраната треба да содржи овошје, зеленчук, житарици, протеини (месо, риба, јајца, мешунки) и млечни производи. Најдобар избор за хидратација се водата и незасладените чаеви.
- Престој на свеж воздух: Студеното време не е причина за останување дома. Секојдневната игра на отворено е задолжителна, додека престојот во игротеки и пред екраните треба да се сведе на минимум.
- Хигиенски навики: Редовно миење на рацете со сапун и учење на детето да ја покрива устата при кашлање и кивање.
Улогата на цревата во одбраната од вируси
Дали знаевте дека над 70 % од имунолошките клетки се наоѓаат во цревата? Истражувањата покажуваат дека здравата и балансирана цревна микробиота има клучна улога во начинот на кој телото се бори со инфекциите.
Вклучувањето ферментирана храна, влакна (пребиотици) и пробиотски култури во исхраната, секогаш во консултација со педијатар, помага во одржувањето на цревната рамнотежа и ја намалува зачестеноста на респираторните и дигестивните пречки кај децата во колектив.
Кога веднаш да одите на педијатар?
Обичните вируси поминуваат со одмор и течности. Сепак, задолжителен преглед е потребен доколку забележите:
- Упорна и висока температура проследена со влошување на општата состојба;
- Отежнато или забрзано дишење;
- Груба кашлица;
- Изразена премаленост или претерана поспаност;
- Одбивање течности, повторувачко повраќање и знаци на дехидратација.
Честите настинки во првите години од градинка не значат автоматски „слаб имунитет“, туку период во кој организмот природно гради отпорност кон опкружувањето.
