Експертите ја решија дилемата – дали децата смеат да пијат протеини?
Многу возрасни пијат протеински шејкови, но дали тие се безбедни за децата? Одговорот не е едноставен, но експертите нагласуваат дека на децата најчесто не им се потребни бидејќи внесуваат доволно протеини преку редовната исхрана.
Иако мала количина не мора да биде штетна, претераниот внес може да доведе до сериозни здравствени проблеми, вклучувајќи појава на камен во бубрезите и оштетување на црниот дроб.
Колку протеини им се навистина потребни на децата?
Родителите често се грижат дали нивните деца добиваат доволно протеини за правилен раст. Сепак, педијатрите тврдат дека со урамнотежена исхрана, целата потребна количина може да се добие од природни намирници.
-Децата можат да ја внесат потребната количина на протеини преку храната, без никакви додатоци – објаснува д-р Џена Вилер. Дури и ако детето е во фаза кога јаде само тестенини или пилешко, тоа сепак внесува одредена количина протеини.
Препорачани дневни количини по возраст:
- 1 до 3 години: 13 g
- 4 до 8 години: 19 g
- 9 до 13 години: 34 g
- Девојчиња (14-18 г.): 46 g
- Момчиња (14-18 г.): 52 g
За илустрација: една чаша млеко содржи 8 грама протеини, исто колку и само 30 грама месо. Четвртина чаша грашок содржи околу 5 грама, што значи дека препорачаните вредности лесно се достигнуваат преку нормални оброци.
Постојат ли исклучоци?
Протеински прашоци може да бидат потребни само кај деца со метаболички нарушувања, неисхранети деца, оние што закрепнуваат од операции или деца кои се на строга веганска исхрана. Во овие случаи суплементацијата мора да биде под надзор на педијатар и нутриционист. За сите други, обичен сендвич со путер од кикиритки е сосема доволен!
Зошто протеинските прашоци може да биде опасен?
Главниот проблем е прекумерниот внес. Тоа може да предизвика дебелеење, запек, дехидрација и оптоварување на бубрезите.
Дополнително, многу протеински прашоци се наменети за возрасни и содржат состојки кои не се соодветни за деца:
- Кофеин: Некои прашоци содржат кофеин колку 6 до 10 шолји кафе, што предизвикува забрзана работа на срцето и вртоглавици кај децата.
- Креатин: Може да ги оштети бубрезите и да предизвика грчеви во мускулите, главоболки и мачнини кај помладите.
- Тешки метали: Бидејќи овие производи не се секогаш строго регулирани, некои од нив може да содржат траги од олово и други тешки метали.
Наместо да посегнуваат по вештачки додатоци, родителите треба да се фокусираат на урамнотежена исхрана богата со природни извори на протеини. На децата им треба вистинска храна, а не прашок од кутија за да растат здрави и силни.
