Во текот на бременоста телото произведува повеќе крв за да го поддржи вашето бебе во развој и ако не внесувате доволно железо или други хранливи материи, вашето тело можеби нема да може да ја произведе количината на црвени крвни зрнца што му е потребна за да ја произведе оваа дополнителна крв. Анемијата може да направи да се чувствувате уморни и слаби, а ако не се лекува или ако е тешка, може да го зголеми ризикот од сериозни компликации.

Губењето крв за време и по породувањето, исто така, може да предизвика анемија. Затоа е важно мајките што дојат да се лекуваат за оваа состојба.

Зошто се јавува анемија за време на бременоста?

За време на бременоста анемијата може да се развие поради недостиг на железо, недостиг на фолна киселина или недостиг на витамин Б12. Недостигот на железо е најчеста причина за анемија во бременоста.

Анемијата со недостиг на железо се јавува кога телото нема доволно железо за да произведе доволно хемоглобин, протеинот во црвените крвни зрнца што носи кислород од белите дробови до остатокот од телото. Кај анемијата со недостиг на железо крвта не може да носи доволно кислород до ткивата низ целото тело.

Анемија со недостиг на фолна киселина – Фолната киселина е витамин што се наоѓа природно во одредени видови храна, како што е зелениот листест зеленчук. На телото му е потребен фолат за да создава нови клетки, вклучувајќи здрави црвени крвни зрнца. За време на бременоста, потребен е дополнителен фолат, но понекогаш не се добива доволно од исхраната. Ова го спречува телото да создава доволно нормални црвени крвни зрнца за да го носат кислородот до ткивата низ целото тело. Вештачките додатоци на фолат се нарекуваат фолна киселина. Недостигот на фолат може директно да придонесе за одредени видови вродени дефекти, како што се дефекти на невралната туба (спина бифида) и ниска родилна тежина.

Недостиг на витамин Б12 – На телото му е потребен витамин Б12 за да создава здрави црвени крвни зрнца. Кога бремената жена не внесува доволно витамин Б12 од исхраната, нејзиното тело не може да создава доволно здрави црвени крвни зрнца. Жените што не јадат месо, млечни производи и јајца се изложени на поголем ризик од развој на недостиг на витамин Б12, што може да предизвика дефекти на невралната туба кај бебето или да доведе до предвремено породување.

Ризик-фактори за анемија во бременоста и по породувањето

Сите бремени жени се изложени на ризик од анемија бидејќи им треба повеќе железо и фолна киселина од вообичаеното. Ризикот е поголем ако сте бремени со повеќе деца, имате две бремености кои се во тесен временски интервал, имате често повраќање поради утринска мачнина, не јадете доволно храна богата со железо и имате анемија пред бременоста. Многу жени губат многу крв за време на породувањето, а ако сте имале анемија за време на бременоста, оваа состојба ќе продолжи и по раѓањето.

Симптоми на анемија за време на бременоста

Во раните фази на анемија можеби немате никакви очигледни симптоми, а многу луѓе обично развиваат анемија за време на бременоста. Затоа, погрижете се да правите рутински крвни тестови за да проверите каква е состојбата. Најчестите симптоми на анемија за време на бременоста се:
-Бледа кожа, усни и нокти
-Чувство на замор или слабост
-Вртоглавица
-Отежнато дишење
-Брзо чукање на срцето
-Проблеми со концентрацијата.

Ризици од анемија во бременоста

Тешка или нетретирана анемија предизвикана од недостиг на железо за време на бременоста може да го зголеми ризикот од:

-Предвремено породување или раѓање бебе со мала родилна тежина
-Потреба од трансфузија на крв (доколку изгубите значителна количина крв за време на породувањето)
-Постпородилна депресија
-Раѓање бебе со анемија
-Доцнење во развојот на детето.

Нетретираниот недостиг на фолна киселина може да го зголеми ризикот од предвремено породување или раѓање бебе со мала родилна тежина или со сериозни вродени дефекти на ‘рбетот или мозокот (дефекти на невралната туба). Нетретираниот недостиг на витамин Б12, исто така, може да го зголеми ризикот од раѓање бебе со дефект на невралната туба.

Третман на анемија

Доколку имате анемија за време на бременоста, вашиот лекар ќе ви препорача да почнете да земате додатоци на железо и/или додатоци на фолна киселина покрај пренаталните витамини. Исто така, треба да јадете повеќе храна богата со железо и фолна киселина во вашата исхрана. По одреден временски период, повторно ќе направите крвни тестови за да може вашиот лекар да провери дали нивоата на хемоглобин и хематокрит се подобруваат. За лекување на недостиг на витамин Б12, вашиот лекар ќе ви препорача земање додаток на витамин Б12.

Извор