Образованието е најмоќното оружје што можете да го користите за да го смените светот, Нелсон Мандела

Едни во училишните клупи со заштитни маски на лицето, други дома пред компјутерите, а некои пред телевизорите. Вака денеска почнува учебната година за учениците во основните училишта. Со еден месец задоцнување, учениците, наставниците и родителите го прифаќаат најневообичаениот образовен предизвик досега кај нас.

Училишните врати денеска се отвораат за учениците од 1. до 3. одделение, чии родители се согласни тие да присуствуваат на настава во училница, како и за децата од повисоките одделенија во околу 600 основни училишта за кои посебна државна комисија одобри да одржуваат класична настава врз основа на процена на ризикот од коронавирусот.

Учениците што имаат соодветна ИТ-опрема ќе учат на националната платформа за онлајн-настава. А другите, за кои се претпоставува дека се околу 40.000 на број, лекциите ќе може да ги гледаат на телевизија или да се едуцираат во соработка со своите наставници.

Прочитајте ги правилата за настава во училиштата

Родителите ќе имаат обврска секој ден пред поаѓање во училиште да му ја измерат телесната температура на детето, а ако таа е покачена, нема да смеат да го носат на училиште. Учениците ќе јадат во училница, маските ќе ги вадат од лицата само додека јадат, родителите нема да смеат да влегуваат внатре, а дезинфекцијата ќе биде честа и задолжителна. Ова се само дел од новите правила што ќе мора да се почитуваат во основните училишта. Наставниот процес во училиштето се одвива во период од 7:00 до 20:00 часот.

„Мајкрософт тимс“ е делот што поактивно ќе се користи на почетокот на учебната година на националната онлајн-платформа за полесно да се одржат предавањата додека се надминуваат предизвиците. Имено, платформата во неколкудневниот тест-период паѓаше кај дел од корисниците. На неа тековно има околу 270.000 корисници, креирани се околу 150.000 предмети. Досега се имаат најавено околу 160.000 корисници.

Ви посакуваме здравје, упорност, трпение, многу знаење и уште повеќе ведрина.

Среќна и успешна учебна година, ученици и наставници!