Тенис, фудбал, цртање, пливање… Детето со огромна желба започнува нова активност, но по неколку тренинзи или часови изјавува дека повеќе не сака да оди.

Како родители, ова знае да биде фрустрирачко, особено откако веќе сте издвоиле пари за опрема и членарина, а слободното време сте го приспособиле на новиот распоред. Сепак, детството е период на истражување, па експертите даваат неколку корисни совети како да постапите во овие ситуации.

Разберете ја вистинската причина за откажување

Психолозите препорачуваат прво да ја откриете причината на желбата за повлекување:

• Анксиозност или страв: Децата често сакаат да избегнат нешто што ги плаши или каде што се чувствуваат несигурни во своите способности.
• Притисок или врсничко опкружување: Доколку тренерот е престрог или има проблем со другите деца, важно е да ја почитувате желбата на детето да се повлече.
• Замор или преголеми очекувања: Понекогаш очекувањата од новата активност се превисоки за нивната возраст.

Ако сè е во ред и станува збор само за обично двоумење, останувањето во активноста помага во градењето истрајност и отпорност. Но, секогаш е важно да се најде вистинскиот баланс помеѓу дисциплината и почитувањето на детските потреби.

Практични совети за родителите: Како да му помогнете?

• Вклучете го во одлуката: Дозволете му на детето само да избере која активност ќе ја проба.
• Започнете со пократки ангажмани: Изберете краткотрајни курсеви, кампови или пробни часови наместо долгорочни и скапи претплати.
• Поставете очекувања: Разговарајте со детето пред да започнете и донесете заеднички договор (на пример: „Ќе го посетуваш овој курс еден месец, па заедно ќе одлучиме дали ќе продолжиш.“).
• Вклучете пријател: Запишете го детето заедно со негов другар за да му биде поубаво и поприродно на почетокот.
• Фокусирајте се на трудот, а не на успехот: Пофалете го неговиот напор наместо да очекувате совршени резултати. Малите поттикнувања (како омилено колаче по успешен тренинг) исто така можат да ја зголемат мотивираноста.

Кога да се загрижите?

Ако забележите дека детето претерано брзо се откажува од секоја активност или ако забележите знаци на поголема затвореност и промена во однесувањето, стручните лица советуваат да погледнете длабоко во причините, можно е детето да се соочува со поголем стрес или анксиозност.

Целта не е да се создадат професионални спортисти или уметници, туку да им помогнеме да откријат што навистина ги исполнува.

Извор