Во бременоста најчесто се наметнува прашањето дали смее да се консумира риба. Насоките за исхрана во бременоста понекогаш се збунувачки, особено кога е во прашање морската храна. Во продолжение следуваат советите од клиниката „Мајо“ во САД.
Кои се предностите и недостатоците од консумирањето морски плодови во текот на бременоста?
Морските плодови, меѓу кои и риба и школки, може да бидат одличен извор на белковини, железо и цинк. Тоа се клучни хранливи материи за раст и развој на бебето. Омега-3 масните киселини во многу риби, исто така, го поттикнуваат развојот на мозокот на бебето. Но, некои видови морски плодови – особено големите, грабливи риби како сабјарки и скуши може да содржат висока количина на жива. Иако живата во морските плодови не е загрижувачка за повеќето возрасни лица, кога се работи за трудниците, се применуваат посебни мерки на внимание. Ако редовно јадете риба богата со жива, со текот на времето може да се насобере во крвотокот. Премногу жива во крвотокот може да го оштети детскиот мозок и нервниот систем во развој.
Која количина на морски плодови се препорачува?
Агенцијата за храна и лекови од САД, Агенцијата за заштита на околината, како и Насоките за исхрана за Американците во периодот од 2015 до 2020 година им препорачуваат на трудниците 220 до 340 грама неделно различни морски плодови. Тоа се 2 до 3 порции неделно.
Што е сигурно за консумација: На трудниците им се советува консумација на морски плодови со малку жива и голема количина омега-3 масни киселини, како што имаат лосос, ослиќ, инчуни, харинга, сардина. Потоа, слатководни риби и плодови како шкампи, бакалар, сом, туна од конзерва, но да се ограничи на 170 грама неделно.
Постојат ли други насоки за консумацијата на морски плодови во текот на бременоста?
Клиниката „Мајо“ предупредува дека трудниците би требало да ги земат предвид и следните мерки за претпазливост: Избегнувајте големи риби грабливки, не јадете сабјарка, скуша.
Не јадете незготвена риба и школки, суши и незготвени морски плодови. Правилно згответе ги. Повеќето треба да се готват на температура од 63 степени. Шкампите треба да ги готвите додека месото не стане со бисерна боја, а школките додека лушпата не им се отвори. Сите што не се отвораат, треба да се отстранат.
Постојат ли други начини за добивање омега-3 масни киселини?
Освен морски плодови, други извори на омега-3 масни киселини се: ленено мелено семе, масло од репка, сончогледови семки и соја. Јогуртот, млекото и јајцата се многу богати со омега-3 масни киселини.
Заклучок: Иако живата може да му наштети на развојот на мозокот на детето, консумирањето просечни количини морски плодови во текот на бременоста нема да предизвика проблеми. Омега-3 масните киселини во многу видови риба може да го поттикнат здравиот когнитивен развој на бебињата. Сѐ додека избегнувате риба за која се знае дека има голема количина на жива или е загадена, плодовите од морето може да бидат редовен дел од вашиот план за здрава исхрана во текот на бременоста, препорачуваат од клиниката „Мајо“.
Автор: Ана Хлача
912