Кога станувате родител, луѓето сакаат да ви даваат совети и мислења за тоа како го воспитувате вашето дете. Ова особено се однесува на начинот на кој го храните бебето, а доењето е на самиот врв на оваа листа.

Доењето е процес кој се учи, потребно е време и практика и за мајката и за бебето за да фатат ритам. Затоа, поддршката и внимателно одбраните зборови се од клучно значење.

Еве 7 реченици што треба да ги избегнувате во разговор со мајка што дои:

1. „Уште ли го доиш бебето, кога мислиш да прекинеш?“

Доењето нема краен рок или возрасна граница. Покрај исхраната, тоа е момент за зближување и утеха. Одлуката е исклучиво на мајката и таа не треба да им се правда на другите.

2. „Доењето беше сонот на мојот живот, бебето веднаш фати!“

Иако мислите дека ова е охрабрувачко, не е така. За новата мајка која се мачи со надоаѓањето на млекото и правилното фаќање на градата, ваквите споредби само прават да се чувствува неуспешно. Наместо тоа, понудете зборови за поддршка.

3. „Градите никогаш повеќе нема да ти бидат исти“

Ова е сосема непотребен коментар. Ако градите хранеле бебе со месеци или години, сосема е природно да изгледаат поинаку. Важно е што ја исполниле својата улога.

4. „Кога би му дала шише, јас би можел да го нахранам“

Ако сакате да помогнете, постојат многу други начини. Доењето создава голема жед, направете ѝ на мајката чај, помогнете со перењето или сменете му ја пелената на бебето. Поврзувањето со бебето не се случува само преку хранењето.

5. „Пак ли е гладно бебето?!“

За ова постои природна причина. Нормално е новороденчињата да цицаат речиси деноноќно. Мајчиното млеко многу лесно се вари, што значи почести оброци и повеќе полни пелени.

6. „Слободно оди во другата соба ако сакаш приватност додека доиш“

Иако можеби ова го кажувате за мајката да се чувствува поудобно, тоа имплицира дека таа треба да се крие. Новата мајка треба да биде поддржана да го храни своето дете на секое место, а не да се изолира. Така се нормализира доењето.

7. „Ќе стане премногу врзано за тебе, не се плашиш дека ќе биде премногу зависно?“

Ова е погрешно сфаќање за доените деца. Создавањето силна и безбедна емоционална врска со сопственото дете е позитивна и здрава работа за неговиот развој.

Извор