Првата средба на бебето со морето е возбудлив, но понекогаш и драматичен момент. Токму тие први чекори често одредуваат дали детето ќе го засака морето или долго ќе се плаши од брановите.

Верувале или не, дури и песокот може да биде предизвик – зрнцата кои влегуваат меѓу прстињата можат да им создадат неудобност на децата кои израснале во град, а дополнителен проблем е и топлината на песокот.

Пополека и без присилување

Најважното правило е: не брзајте!

• Гледајте од далечина: Прво набљудувајте го морето од брегот.
• Без влечење и носење в раце: Дозволете му на детето само да се приближи до водата, со одење или со лазење.
• Чекорете по работ: Шетајте по брегот каде што малите бранови едвај им ги допираат нозете. Дури откако ќе се навикне на ова, може да влезете малку подлабоко.

Совет од психолог: Во ниту еден случај да не се присилува детето да влезе во вода. Ако покаже страв од големото синило или од сјајот на сонцето, тргнете се. Обидете се пак следниот ден.

Времетраење на капењето и температура на водата

• Идеална температура: Морето е пријатно за деца ако температурата не е пониска од 24-25 степени.
• Време во вода: Првото капење кај помалите деца треба да трае меѓу 5 и 10 минути, додека постарите можат да останат 10 до 15 минути.

Внимавајте да не му стане ладно! Ако забележите посини усни или треперење на брадата, веднаш извадете го детето од вода. Избришете го со крпа, облечете му сува маичка и понудете му топла напивка за брзо да се загрее.

Корисни совети за безбедност на плажа

• Мијте му ја устата со чиста вода: Ако детето случајно голтне морска вода (или вода од базен), поттикнете го да ја исплакне устата со чиста вода за да се намали ризикот од инфекции.
• Избегнувајте метеж и силно сонце: Најдобро време за плажа со бебе е наутро пред 11:00 часот и попладне по 17:00 часот.
• Бидете смирени: Ако детето се исплаши, реагирајте природно и смирено. Вашата опуштеност ќе му помогне побрзо да го надмине стравот.

Првите пливачки чекори

Кога детето првпат влегува во вода за да учи да плива, потпрете се исклучиво на вашите раце, а не на помагала.

• Држете го бебето под пазувите, а постарото дете под градите.
• Дури откако ќе се почувствува целосно сигурно и ќе го изгуби почетниот страв, може да му ставите мускули или гума за пливање.

Без разлика какви помагала за пливање користи детето, тоа никогаш не смее да биде во вода без надзор од возрасен!

Извор