Како ви звучи комбинацијата од жена во перименопауза и тинејџер? Ако го прашате мојот сопруг, ќе ви каже дека тоа е убиствена комбинација и дека успешно ѝ го „спасил“ животот на својата драга ќерка од полулуда мајка.

Перименопаузата трае подолго од тинејџерските години, па сега имаме реприза, но малку изменета. Старо-нова комбинација е мајка во перименопауза и син тинејџер. Сè уште не сме стигнале до убиствена атмосфера, но мама е подготвена за вистински боксерски меч со синот.

Со искуството што го имам со ќерката и со реакциите на синот, понекогаш ми доаѓа да се смеам, а понекогаш ми е жал за него. Кај него има емоции што самиот не може да ги разбере, ниту да ги изрази. Сепак, во ретките моменти на мир разговорот помага. Иако морам да признаам дека синот и таткото моментално многу подобро се согласуваат.

Многу разговори започнуваа со негова констатација, потоа моето негирање, па расправа „зошто-затоа“. Стигнавме и до чувствителната тема за мама-нутриционист. Многумина ќе се запрашаат како е можно по толку напишани текстови и испратени пораки, но со тажно срце морам да кажам дека и ние го имаме тој проблем.

Сè започна на крајот од минатата учебна година, кога синот се побуни дека храната во училишната менза не му е доволна и дека повеќе би сакал да му приготвувам ручек за носење. Добро, си помислив, тоа е најдобриот начин да контролирам што јаде.

Новата учебна година почна лесно: носеше ручек и почна да избира што сака да носи. Морам да напоменам дека нашиот син Лаки е одличен во кујната и веќе неколку години прави прекрасна храна (а има само 13 години), секогаш се труди да ни направи нов специјалитет што со радост го јадеме. Мојата идеја за училишни оброци е хранливо, вкусно и лесно за подготовка, а неговата вкусни и посложени рецепти.

Училишниот ручек почна да се враќа дома и дома го јадеше. Морам да признаам дека веднаш ми се затемнува пред очи и со покачен тон го прашувам зошто не јадел; неговиот одговор обично е дека не бил гладен, немал време или го заборавил ручекот во шкафчето. Не знам како не умира од глад со оглед на тоа што појадува во седум наутро, а се враќа дома околу шест попладне. Според неговите зборови, веднаш го „напаѓам“ дека сигурно си купил некакви глупости за јадење. Му се заканувам, па два-три дена јаде ручек. И пак по старо. Потоа му велам искрено да ми каже дали јадел, а тој: „Не“. Мене пак ми се стемнува, почнувам да викам, а тој: „Но мамо, рече да ти кажам искрено и не те излажав“. По такви зборови мораш да се смириш и да најдеш друго решение. И еве што договоривме:

Мора да изеде барем половина од понесениот ручек, остатокот дома и јас нудам комбинации, а тој избира од понуденото.

Важно е оброкот секогаш да содржи протеини. Често приготвувам парчиња месо со зеленчук, но само по еден вид за секој ден да е различен: бело месо, свинско филе или телешко, со брокула, морков, прокељ, пиперка или кој било зеленчук од фрижидерот. Месото секогаш е исечено на помали парчиња за побрзо да се испече, а зеленчукот може да биде печен или свеж, зависно од видот. Понекогаш правиме и болоњезе или гулаш со тестенини или ориз.

Порака до сите момчиња

Драг Лаки и момчиња-тинејџери, еве зошто е важно да имате редовни и разновидни оброци:

• Телото ви е во интензивен раст и развој и потребна ви е доволно енергија;
• Хормоните „дивеат“, па треба и нив да ги нахраните. За баланс на тестостеронот се потребни месо, риба, сирење и јајца;
• Зеленчукот придонесува за здравјето преку витамини и минерали;
• Редовните оброци го контролираат апетитот и спречуваат напади на глад кога јадете редовно;
• Важни се и за концентрацијата на училиште;
• Бидејќи спортувате, домашните оброци со протеини овозможуваат побрзо закрепнување и раст на мускулите.
• Слатките се неизбежни, но најдобро е да се домашни.

Енергетските пијалаци не се „кул“ затоа што го нарушуваат ритамот на срцето.

Извор