Раните трауматски искуства, како физичкото или емоционалното занемарување, сиромаштијата, разводот, насилството или зависностите можат да го забрзаат развојот на мозокот на децата. Иако тоа може да изгледа како „брз напредок“, всушност, мозокот станува помалку флексибилен и подложен на стрес, што подоцна може да доведе до анксиозност, депресија, проблеми со зависности, па дури и до срцеви заболувања или рак.

Стресните околности навистина можат да предизвикаат побрзо физичко созревање. На пример, порано влегуваат во пубертет или порано им никнуваат трајните заби. Но клучниот орган кој страда е мозокот, кој во раното детство е најпластичен и отворен за учење. Децата што растат во стресни услови побрзо ги поминуваат развојните фази, губејќи дел од способноста да истражуваат, да се приспособуваат и да учат нови работи.

Од друга страна, детството во безбедна, стимулативна и разновидна средина, на пример, квалитетни и богати предучилишни програми, ја одложува зрелоста на мозокот и ја продолжува неговата пластичност. Децата имаат повеќе време за истражување, игра и учење на животни вештини, што подоцна им помага да бидат приспособливи и успешни возрасни. Искуствата што нудат слобода, љубов и различни можности не само што го подготвуваат детето за образование, туку му овозможуваат да развие креативност, социјални вештини и отпорност на стрес.

Истражувањата покажуваат дека голем број деца немаат ресурси за вакво детство, особено оние од посиромашни семејства. Поддршката за децата, преку време со родителите, квалитетно образование и социјални програми, е клучна не за да се забрза развојот, туку за да им се овозможи да останат деца доволно долго, да учат и да растат здрави.

За жал, како што покажуваат истражувањата за трауматски искуства, премногу деца и возрасни немаат потребни ресурси за вакво детство. Сите нови истражувања покажуваат едно исто: без разлика дали станува збор за финансиска помош за родителите, породилно отсуство или квалитетно предучилишно образование, обезбедувањето поддршка за децата е најдобар начин да се овозможи новите генерации еден ден да станат успешни возрасни. Не затоа што тоа го забрзува нивниот развој, туку затоа што им овозможува да останат деца подолго време.

Извор