Ново истражување од организацијата „Комон сенс медија“ предупредува на опасностите што играчките со вештачка интелигенција ги претставуваат за децата, а за кои многу родители можеби не се свесни. Истражувањето покажува дека ваквите производи можат негативно да влијаат врз детскиот развој, да ги изложат децата на несоодветни содржини и да ја нарушат нивната приватност. Поради тоа, експертите препорачуваат целосно избегнување на ВИ-играчки за деца помали од 5 години, како и голема претпазливост кај деца од 6 до 12 години.

Според дефиницијата на „Комон сенс медија“, ВИ-играчките се во вид на кадифени животни, роботи и кукли кои се активираат со глас, поврзани се на интернет и користат вештачка интелигенција за комуникација со децата. Но, ваквите играчки постојано „слушаат“ и собираат податоци.

– Повеќето играчки мора да поминат строги безбедносни тестирања пред да се појават на пазарот, но сè уште недостигаат сериозни заштитни механизми за децата кога станува збор за вештачката интелигенција – изјави Џејмс П. Стајер, основач и извршен директор на „Комон сенс медија“.

И покрај тоа, анкета спроведена од истата организација покажува дека речиси половина од родителите веќе купиле ВИ-играчки за своите деца или размислувале да го сторат тоа.

– Родителите треба да бидат внимателни и добро информирани пред да донесат одлука што е најдобра за нивните деца – предупредува Стајер.

Несоодветна содржина

За време на тестирањето на три популарни ВИ-играчки, истражувачите откриле сериозни ризици. Според извештајот, 27 отсто од одговорите што ги давале играчките биле оценети како целосно несоодветни за деца.

Ризици за приватноста и безбедноста

Истражувањето покажало дека ВИ-играчките собираат податоци од приватниот простор на децата, вклучувајќи гласовни снимки, транскрипти од разговори и податоци за однесување. Во истражувањето се нагласува дека децата не можат свесно да дадат согласност за собирање податоци, а родителите честопати не го разбираат целосниот обем на информациите што се прибираат.

Дополнително, играчките се подложни на безбедносни пропусти, што може да доведе до откривање на чувствителни лични податоци. Дури 83 отсто од анкетираните родители изразиле загриженост за заштитата на личните информации.

Штетно влијание врз развојот

Во процената се наведува дека ВИ-играчките се дизајнирани да поттикнуваат емоционална приврзаност. Децата се особено ранливи на вакви механизми бидејќи нивниот мозок сè уште се развива.

Анкетата покажала дека осум од десет родители се загрижени како да постават граници и да го ограничат времето што децата го поминуваат со овие играчки, во споредба со времето поминато со пријатели или семејството.

Небезбедна технологија

Истражувањето открило дека ВИ-играчките често се оптоварени со грешки и технички проблеми. Одговорите можат да бидат неточни, активирањата да предизвикаат погрешна содржина, а препознавањето на гласот честопати не функционира правилно. Ова е особено загрижувачко за производи што се претставуваат како „паметни“ и кои потенцијално би можеле да ги заменат традиционалните играчки од кои учат децата.

Што можат да направат родителите?

Поради сите овие причини, „Комон сенс медија“ ги советува родителите целосно да ги избегнуваат ВИ-играчките за деца помлади од 5 години и да се определат за традиционални играчки. За децата на возраст од 6 до 12 години се препорачува внимателно да се процени дали ваквата играчка навистина носи додадена вредност во нивниот живот.

Доколку сепак се одлучите за купување, поставете јасни ограничувања, како и кај секоја друга технологија, и внимателно проверете ги поставките за приватност. Можно е да се оневозможат опциите што ѝ дозволуваат на играчката постојано да слуша.

Надгледувајте како детето ја користи играчката и внимавајте на предупредувачки знаци, како прекумерна емоционална приврзаност. Обезбедете детето да има доволно време за слободна, неструктурирана игра со традиционални играчки и дружење со врсници.

На крајот, експертите ги охрабруваат родителите да им веруваат на сопствените инстинкти и потсетуваат дека традиционалните играчки и човечките односи не можат да се заменат.

Извор