Британи Патерсон (41) од Џорџија добила телефонски повик од полицијата дека нејзиниот 10-годишен син Сорен го напуштил нивниот селски дом и се упатил кон градот. Тоа се случило додека, како што вели, била на лекарски преглед со своето второ дете, но не била загрижена и лута.
-Тоа воопшто не е опасен пат. Не се плашев за него, ниту се грижев за неговата безбедност – рекла мајката.
Стравот настанал подоцна, кога полицијата дошла во куќата на Патерсон и ѝ ставила лисици на рацете пред децата. Мајката била уапсена под сомнение за несовесно однесување и морала да плати 500 долари. Иако оваа приказна е вознемирувачка, особено за родителите кои дозволуваат дете на возраст од Сорен да шета низ соседството, таа не е единствената.
Друг пример е брачен пар од Силвер Спринг, Мериленд, кој се соочил со истрага пред речиси 10 години, откако им дозволиле на своите деца, на возраст од 10 и 6 години, да талкаат низ соседството без надзор. Исто така, една мајка од Јужна Каролина била уапсена затоа што му дозволила на својот деветгодишен син да игра во парк, додека работела во блискиот ресторан за брза храна. Дали овие родители го прекршиле законот и ги ставиле своите деца во опасност?
Која е возраста кога детето може да оди само по улица?
Експертите велат дека десет години е прифатлива возраст за повеќето деца да можат самостојно да одат во прошетка, а дека тоа е дури и корисно. Се разбира, многу зависи од процената на родителите и индивидуалните потреби на детето.
-Секое дете има различно ниво на способности, така што родителите треба да користат процена за зрелоста и подготвеноста на нивното дете, но десет години се во границите на подготвеноста за повеќето деца – забележува психологот Емили Едлин.
Придобивките од давање слобода на децата
Експертите се загрижени за влијанието на општеството засновано на страв врз децата. Психологот Александра Стратинер тврди дека умерената слобода е клучна за воспитување емоционално здрави деца.
-Децата на кои не им се дава слобода на начини што се соодветни за развојот, може да имаат помала способност да донесуваат одлуки и да станат помалку самоуверени додека растат. Може да станат премногу зависни од надворешни совети или да станат вознемирени кога треба да направат нешто сами. Исто така, може да немаат доверба во сопствените одлуки, што може да се поврзе со депресија и анксиозност – вели д-р Стратинер.
Д-р Едлин ги препознава и придобивките од слободата што децата можат да ги имаат.
-Можноста децата да шетаат без возрасни помага да се изгради нивната самодоверба и независност, поттикнувајќи го нивното целокупно чувство на автономија. Родителите треба да се охрабруваат да им ја дадат на децата оваа слобода, а не да ги казнуваат – заклучила таа.
912