Современиот начин на живот носи многу предизвици кои може да бидат особено тешки за тинејџерите. Светската здравствена организација достави детален извештај за проблемите со кои се соочуваат денешните тинејџери.
Според тој извештај, секој седми тинејџер на возраст од 10 до 19 години имал ментални проблеми во 2021 година, кои сочинуваат околу 13 отсто од сите болести. Оваа студија истакнува дека осаменоста, анксиозноста и депресијата се најчестите проблеми на тинејџерите, а вообичаени се и дрогата, злоупотребата на алкохол, емоционалните и менталните нарушувања, кои една третина од тинејџерите ги доживеале пред 14-годишна возраст, а половина пред 18-годишна возраст.
Други проблеми
Недостигот на железо или анемијата е уште еден проблем со кој се соочуваат многу деца. Според процените на СЗО, меѓу 60 и 70 милиони девојчиња на возраст од 10 до 14 години страдаат од анемија, а таа бројка се зголемува на 80-90 милиони кај девојчињата на возраст од 15 до 19 години.
Друг проблем со кој се соочуваат многу тинејџери денес е дебелината. Според извештаите, во 2020 година дури 10 отсто од тинејџерите момчиња и осум отсто од тинејџерките низ светот биле дебели. Тие бројки се очекува да се удвојат до 2035 година. Дебелината кај тинејџерите е поврзана и со времето што го поминуваат играјќи компјутерски игри или следење на социјалните мрежи.
На листата со проблеми со кои се соочуваат тинејџерите е и насилството, а секоја година милиони млади се жртви на разни видови насилство. Исто така, осаменоста е уште една работа која ги мачи денешните тинејџери, а особено е изразена кај девојчињата. Од 2012 до 2018 година двојно се зголемил бројот на млади што пријавиле осаменост, а тоа се поврзува и со активното користење на социјалните мрежи, иако сè уште не е докажана врската меѓу нив.
СЗО го наведува и незнаењето за репродуктивното здравје како еден од главните проблеми кај адолесцентите, што може да доведе до сериозни последици врз нивното здравје, вклучително и ширење на ХИВ и други сексуално преносливи инфекции.
Автор: Наташа Златковиќ
912