Едноставен тест за исип што секој родител треба да го знае
Болничарката Ники Јуркуц открила дека постои спасувачки тест кој може да одговори на прашањето дали детето боледува од сериозна болест кога има исип. Ако го ставите прстот на исипот и притиснете, а притоа бојата на кожата не се промени, тоа може да значи дека детето има менингококна болест, која може да предизвика фатална септикемија.
„Ова е алатка што треба да ја користите кога вашето дете ќе развие исип. Ако исипот избледи или ја промени бојата кога ќе го притиснете, тоа е смирувачки знак. Ако не бледнее, тоа може да биде знак за посериозна болест“, објавила таа.
Во вториот случај, неопходно е да се посети лекар кој ќе го прегледа детето.
Менингококната болест е предизвикана од бактеријата Neisseria meningitidis. Може да предизвика низа болести, вклучувајќи менингитис и инфекции на крвотокот, како што е септикемија. Менингококната септикемија се јавува кога бактериите влегуваат во крвта и таму се размножуваат и произведуваат токсини.
Симптомите вклучуваат треска и покачена температура, замор, повраќање и ладни раце и нозе. Може да се јави силна болка во мускулите, зглобовите, градите или стомакот, забрзано дишење, дијареја и, во подоцнежните фази, може да се појави темновиолетов исип. Важно е да се побара лекарска помош што е можно поскоро ако детето ги има овие симптоми.
