Многу деца пред спиење бараат нешто да грицнат, особено во активниот период од растењето. Потребата за јадење пред спиење може да се јави ако вечерата била порано, неколку часа пред легнување. Доколку се искомбинира со целодневната исхрана, доцната вечерна ужина може да најде место во здравата и правилна исхрана. Сè додека се води сметка за дневниот внес на калории и нутритивно-вредни продукти, исхраната на детето ќе биде на вистинскиот пат.

Како да се испланира доцната вечерна ужина?

* Оброкот треба да се испланира најдоцна 45 минути пред легнување. На овој начин ќе бидете сигурни дека храната добро ќе „легне“ во стомакот на детето, а исто така ќе има време и да ги измие запчињата пред спиење.
* Добрата вечерна ужина треба да содржи јаглехидрати и протеини. Јаглехидратите ќе помогнат за производство на сератонин, а протеините ќе го заситат детето.
* Ужината треба да биде мала. Таа не е оброк, туку дополнување кое ќе помогне детето полесно да заспие.
* Ужината давајте ја само кога детето навистина е гладно, а не како навика.

Хранливата вредност на вечерната ужина

Здравата ужина пред спиење може да ги дополни дневните потреби за хранливи материи. Ако детето во текот на денот не добило доволно хранливи материи, може да му се дополнат во вечерната ужина.
Вечерната ужина што содржи триптофани ќе му помогне на детето полесно да заспие. Триптофанот (аминокиселина) е претходник на сератонинот (хормонот на среќата). Сератонинот е претходник на мелатонинот (хормонот кој го регулира циклусот на сонот). Најдобро е триптофанот да се комбинира со јаглехидрати. Тие ги носат сите други аминокиселини директно во мускулните клетки. Бидејќи триптофанот не реагира на јаглехидрати, останува сам и така полесно влегува во крвта, а потоа оди и до мозокот.

Добар извор на триптофан е месото од живина (пилешко, мисиркино), масната риба (лосос, туна, харинга, сардина), јаткастите плодови и семките.
Треба да се води сметка и за доволниот внес на магнезиум и калиум. Магнезиумот е минерал кој помага за смирување и релаксација на нервите и мускулите. Калиумот го потпомага магнезиумот во овој процес.

Предлози за вечерна ужина

* Сендвич со мисиркино месо – парче леб со малку путер и парче мисиркино месо.
* Јајце (белката е одличен извор на триптофан) и тост.
* Парче леб со младо сирење.
* Пита со вишни или цреши (природно содржат мелатонин) со шолја млеко.
* Банана – содржи калиум, магнезиум и триптофан.
* Овесна каша – сложен јаглехидрат кој подолго обезбедува ситост, што е важно пред заспивање, а воедно е извор на триптофан.
* Јаткасто овошје и семки – одличен извор на магнезиум кој ги релаксира нервите и мускулите, како и витамин Б6 кој помага за создавање мелатонин во организмот.
* Шолја топло млеко со какао на детето ќе му овозможи полесно да заспие.

Автор: Дијана Радетиќ, нутриционист