Ако сакате да вежбате и во текот на бременоста, еве што треба да знаете – кои вежби се безбедни, а кои не и на што треба да обрнете внимание.
Во бременоста не би требало да ја практикувате вежбата „планк“ или да правите склекови бидејќи со тоа се зголемува ризикот од непријатно раздвојување на стомачните мускули.
Она што е потребно да го знаете на почетокот е дека на сите бремени жени не им одговараат исти вежби, но постојат некои важни информации што би требало да ги знаат сите идни мајки.

Прво и најважно – не е опасно да вежбате во текот на бременоста – сè додека тоа го правите со дозвола од лекар и додека правите вежби кои се приспособени за вас. И дополнително – вежбањето во текот на бременоста има многубројни предности.

– Докторите во 1985 година им кажале на жените дека е опасно да вежбаат во текот на бременоста. Тогаш постоела теорија дека физичката активност не е добра за фетусот – вели гинекологот д-р Раул Артал.

Д-р Артал вели дека вежбањето во бременоста може да ги намали болките и тегобите во бременоста, да спречи дебелеење на идната мајка (што не е толку важно за изгледот колку за здравјето на мајката и на бебето) и да го намали ризикот од компликации, како гестациски дијабетес и прееклампсија.

Според него, вежбањето помага и новороденчето да има здрава тежина при раѓањето и го намалува ризикот од итен царски рез.
Освен тоа, ако не сте исцрпени, вежбањето може да ви помогне да имате повеќе енергија, смета Мари Релин, експерт за пренатални и постнатални вежби.

Значи, од вежбањето во текот на бременоста имаат придобивки и мајката и бебето, но овие вежби не би требало да ги практикувате во текот на бременоста:

Избегнувајте спортови и вежби со висок интензитет

Професорот Џејмс Пиварник, кој се занимава со кинезиологија и епидемиологија и кој повеќе од 30 години ги изучува пренаталните вежби, вели дека целта е да избегнувате активности кои можат да доведат до директен удар во стомакот, на пример, ракомет, бокс и скијање, кои не се препорачуваат за бремени жени.

Не практикувајте вежби со лежење на грб

Особено кога ќе влезете во второто тримесечје не се препорачуваат вежби што се изведуваат на грб, бидејќи матката ја притиска вената која пумпа крв до срцето, вели д-р Артал. Тоа може да доведе до блокада на циркулацијата и намалување на крвниот притисок.

Не се препорачува да кревате тегови

– Ако премногу крв оди кон мускулите, можеби бебето нема да добива доволно крв за него – вели д-р Артал. Наместо кревање поголема тежина, тој советува да направите повеќе повторувања со помали тегови, потенцирајќи дека не треба да кревате ништо потешко од 4 килограми.

Јогата не е добар избор за бремените жени, но ова не се однесува на јога специјално приспособена за бремени жени. Главно не се препорачува ништо што може да ја зголеми температурата на телото или потенцијално да доведе до дехидратација.

Не практикувајте вежби за стомачни мускули

Пиварник истакнува дека овие вежби можат да доведат до благо раздвојување на стомачните мускули (диастасис ректи) што никако не го посакувате.

– Тоа всушност многу често им се случува на жени во третото тримесечје – истакнува д-р Релин, која советува да не правите стомачни вежби ниту какви било вежби што подразбираат подигање на горниот дел од телото од второто тримесечје.
Кога ќе правите вакви вежби во одмината бременост, имајте на ум дека бебето е сè потешко и дека дигањето на таков товар може да доведе до раздвојување на мускулите.

Ако ве боли и не ви е пријатно, не форсирајте се

– Вие сте бремени и вашето тело минува низ многубројни промени – поради хормоните, лигаментите се поопуштени, балансот ви е променет и дефинитивно би требало да ја забавите дневната рутина, дури и ако сте фит. Ако не ви е пријатно или чувствувате некаква болка, не правете ја таа вежба – советува Пиварник.

И д-р Артал подвлекува дека не треба да правите вежби кои ви предизвикуваат некаква болка: „Форсирањето може да нанесе само штета“.

Според „Водич за вежбање во бременоста“, безбедни вежби во текот на бременоста се одењето, пливањето, возењето статичен велосипед, јога и пилатес приспособени на бремени жени.
Исто така, добро е да правите вежби за задник бидејќи тие мускули ја поддржуваат карлицата, која во бременоста поминува низ многубројни промени.
И на крај, важна работа околу Кегеловите вежби – сите стручњаци велат дека тоа е одличен „тренинг“ за породување, така што добро е тие да ви станат секојдневна рутина.