За идните мајки, недостигот на сон по раѓањето на бебето е факт. Но, исто така, може да се случи и во текот на првото тримесечје од бременоста – повеќето жени го доживуваат тоа. Желбата да се оди на спиење порано е поголема, а и често се соочуваат со неквалитетен сон. Бременоста, сепак, може да предизвика да се чувствувате исцрпени во текот на денот, а да предизвика несоница во текот на ноќта.

Што претставува несоницата?

Тоа значи дека имате тешкотии да заспиете и да останете во таа состојба одредено време. Жените може да имаат несоница во текот на сите фази од бременоста, но таа е најчеста во почетниот период. Но, добра вест е дека несоницата не е штетна за вашето бебе. На крајот од бременоста, пак, многу жени имаат тешкотии во однос на комфорот, па затоа доаѓа до неможност за квалитетен сон. Во првото тримесечје немате толку голем стомак што ќе ви предизвикува тешкотии во положбата, но постојат други проблеми што може да доведат до нарушување на сонот.

Ова се неколку од причините:

– Потреба за често мокрење;
– Мачнина и повраќање;
– Болки во грбот;
– Чувствителност на градите;
– Абдоменална непријатност;
– Грчеви во нозете;
– Недостиг на здив;
– Киселини;
– Лоши соништа.

Другите причини може да се поврзани со стресот. Чувството на анксиозност за породувањето и добивањето нов член во семејството, или грижата за тоа како ќе направите баланс помеѓу работата и мајчинството, предизвикува несоница. Може да ви биде тешко да си го одвлечете вниманието од овие мисли, но запомнете дека грижењето не е продуктивно. Наместо тоа, напишете ги сите ваши грижи на хартија, па така ќе имате можност да смислите решенија. Ако ги нема или нема што да направите, фокусирајте се на нешто друго – така ќе го испразните умот и потоа ќе можете полесно да заспиете. Исто така, бидете искрени со партнерот и споделете ги чувствата, па може да ви помогне да се чувствувате подобро.

Развијте рутина за спиење

Ова е најдобрата работа што може да ја сторите за да се справите со несоницата – поставување здрави навики за спиење. Обидете се прво секоја вечер да одите во кревет во исто време. Започнете ја рутината со нешто што ве релаксира. Избегнувајте ги екраните барем 1 час пред спиење. Сината светлина од ТВ, вашиот мобилен телефон или таблет може да влијае врз ритамот на вашето тело, па наместо тоа, обидете се да читате книга. Топла бања, исто така, може да ве успие. Само бидете внимателни со температурата, да не биде претопло.

Исхрана и вежбање

Исхраната и редовното вежбање може да ви помогнат во справувањето со проблемот.

Хидратација

Пиењето течности, односно големи количества вода во текот на денот може да ви помогне. Но, намалувајте ја количина по 19 часот. И обидете се да избегнувате кофеин во текот на попладнето.

Храна

Јадете здрава вечера, и полека намалете ги намирниците што ви предизвикуваат киселини. Јадете порано, но не одете во кревет гладни. Изедете лесна ужина ако морате да јадете подоцна. Нешто што содржи високо ниво на протеини и ќе го одржува нивото на шеќер во организмот на соодветно ниво. Чаша топло млеко, исто така, може да ве успие.

Комфорот е клучот

Просторот во кој функционирате и вашата спална соба треба да бидат пријатни за престој – поголемиот комфор значи и подобар сон. Легнете настрана, поставете перница меѓу колената и под стомакот. Ослободете се од градниците или облечете некој поудобен.

Климатска промена

Собата нека биде изладена, темна и тивка за оптимални услови за спиење. Користете ноќно светло во тоалетот за да не се расоните.

Обидете се да се релаксирате

Практикувајте начини со кои целосно се релаксирате во текот на вечерта.

Одвлечете си го вниманието

Ако лежите во кревет и сте разбудени, станете и насочете се кон нешто сè додека не се почувствувате доволно изморени за да заспиете. Поефикасно е ова отколку да лежите во кревет и да зјапате во часовникот.

Опуштање

Практикувајте медитација, техники за релаксација, вежбање. Овие методи често се подучуваат на курсевите за идните мајки.

Дремка

Кај повеќето жени несоницата поминува по првото тримесечје. Ако имате мака, обидете се со попладневни дремки. Но, избегнувајте лекови, суплементи или билки пред да се консултирате со вашиот лекар. Ако несоницата ви влијае врз функционирањето, вашиот лекар може да ви препише и седатив кој е безбеден за консумација во текот на бременоста.

Извор



912

X