Сине, многу си играше денес. Трчаше, паѓаше, ги удираше колената, плачеше, стануваше, се смееше, ја бришеше потта од челото со ракавот и го стори истото одново.

Сега дојди, истреси ја прашината од себе, тргни ја капата малку настрана, само колку да ти ги видам очите и седни до мене. Ќе ти кажам што гледам во нив. Го гледам небото, ги гледам ѕвездите, ги гледам морето и брановите, ја гледам иднината. Гледам дека си среќен денес, се сопнуваш, паѓаш, се тркалаш во прашина, тажен си, па плачеш… И ја чувствуваш воспалената рана од падот, но не сакаш да ја прекинеш играта и затоа брзаш. И ти се допаѓа тоа што не запираш, затоа што се правиш уште поголем херој. Тогаш гледаш дека победуваш, па повторно си среќен. Заглавуваш уште илјада пати, но секогаш стануваш, продолжуваш понатаму и постигнуваш повеќе. Со истиот сјај во очите. И не обрнувај премногу внимание на таа прашина оставена на твоето лице. Нека стои како доказ дека си се издигнал од неа. Дозволи ѝ да ти ги извалка образите, кошулата и чевлите, но никогаш не дозволувај да ти ја извалка душата, да ти ја искриви насмевката и да ги изопачи твоите соништа. Затоа што соништата се важни.

Важно е што сонуваш. Дали ќе сонуваш да ги допираш ѕвездите, да пловиш по морињата, да освојуваш огромни простори, нечии насмевки и чувства или ќе сонуваш за скапи автомобили и многу пари?

Сакам да имаш пари на јаве, но не загадувај ги твоите соништа со нив. Соништата за пари брзо се трошат, а ти не сакаш да бидеш маж без соништа. И чувај ги твоите соништа, ако се вистинити. Не споделувај ги, нека бидат твои и ничии други. Кога понекогаш се будиш, само намигни ми и дозволи ми да погодам каде си бил. И твоите очи ми кажуваат дека ќе бидеш добро момче, исто како и сега, малку срамежливо. Знам што ќе ми кажеш – никој не се срами од ништо овие денови. И не дозволувај да бидеш заразен од тоа. Образите нека ти станат црвени, колената да ти треперат и дланките да ти се потат. И покажи дека се грижиш… Дека барем малку се грижиш што ќе каже девојката која навистина ти се допаѓа и што ќе мисли некој што ти изгледа важен. Не е можно да нема важни. Оние што и кога нема ветар летаат змејови и господарат на немирните мориња. И не е можно поради која било девојка да не ти се стресат колената и да не ти трепери срцето, затоа што ќе сакаш да делиш сладолед со неа и со никоја друга. Тие ќе остават трага на твоето срце и ќе создадат спомени. Гледај ги таму каде што те гледам и јас сега и понекогаш сериозно засрами се пред нив. Дали си загрижен како срамот ќе изгледа во очите на другите луѓе? Ако се навистина големи, ќе изгледаш и ти голем во нив.

Сега оди, имаш уште малку време, наскоро ќе се стемни.

Здраво, сине. Се врати дома. Ова е твојата сестра. Мало девојче, утре ќе биде мајка, жена. Еден ден, и ти ќе имаш жена. Нејзината сила ќе биде огромна. И не дозволувај таа да те плаши. Никогаш не бори се против таа моќ, бидејќи ќе изгубиш. Ќе изгубиш задоволна сопруга, а јас сакам само една за тебе. Ти си машко. И твојата улога е голема. Биди силна поддршка, биди добар соговорник и уште подобар пријател, биди заштитник и биди храбар. Секогаш похрабар од неа. Но, ако некогаш се обидеш да ја докажеш твојата машкост на кој било начин, знај дека си ја изгубил. И ако никогаш не го докажеш тоа, само тогаш ќе бидеш вистински маж. За неа. За жена ти. А јас? Знам дека ти си вистински маж. Затоа што вистинските мажи имаат блесок во очите. Се срамат, сонуваат, паѓаат, плачат, стануваат, продолжуваат понатаму… а пред сѐ ги сакаат и ги почитуваат жените.

Сам си подготвил вечера!? Браво, сине! Сега, добра ноќ!

Извор