Пренесувањето шпекулации и прекажувањето кој што рекол или направил не е омилено однесување на возрасните. Сепак, кога станува збор за децата, она што за родителите изгледа како иритирачка навика или озборување, всушност, може да биде знак дека детето се обидува да пренесе некоја важна порака.

Не секое прекажување е исто. Челси Андерсон, експерт за грижа за деца, идентификува пет различни причини зошто децата пренесуваат информации за другите. Според неа, ова не се само лоши навики, туку различни видови повици за помош и комуникација кои возрасните често погрешно ги ставаат во една иста категорија.

Што се крие зад детското прекажување и пренесување шпекулации?

1. Барање вистинска помош

Понекогаш детето доаѓа да прекаже ситуација затоа што навистина се чувствува уплашено, повредено или е жртва на врсничко насилство. Во овој случај, пренесувањето на информацијата е директен повик до возрасните за заштита.

2. Потрага по правда и тестирање на правилата

Ова е еден од најкомплексните моменти. Кога детето прекажува дека некој друг ги прекршил правилата, тоа всушност ги тестира границите: сака да провери дали правилата важат за сите еднакво и дали тие правила сè уште постојат.

3. Градење блискост и споделување емоции

Како што возрасните по работниот ден му раскажуваат на партнерот за своите работни проблеми за да си ги олеснат емоциите, така и децата имаат потреба да раскажат некоја ситуација за да ги процесираат своите чувства. Тие тогаш не бараат да казниме некого, туку едноставно бараат поврзаност и поддршка од родителот.

4. Недостиг на вештини за решавање конфликти

Детето пренесува детали за некоја ситуација или конфликт во кој се наоѓа со друго дете бидејќи искрено не знае како самото да ја реши ситуацијата. Возрасните често претпоставуваат дека решавањето проблеми е вродена вештина, но ако не го научиме детето како да се справи, тоа за секое несогласување ќе доаѓа да ни прекажува.

5. Борба за статус и подобро место во друштвото

Овој тип прекажување се случува кога детето пренесува шпекулации за да се издигне себеси преку намалување на вредноста на друг. Кога другото дете е прикажано во лошо светло или ќе влезе во неволја, детето моментално се чувствува подобро и поважно.

Зошто е важно ова препознавање?

Разбирањето на меѓучовечките односи е сложен процес за децата. Кога родителите ќе научат правилно да препознаат за каков тип прекажување и пренесување информации станува збор, тие можат да му ги дадат на детето потребните алатки сами да се справуваат со предизвиците, што автоматски доведува до намалување на потребата за ширење шпекулации и прекажување.

Извор