Родени помеѓу 1946 и 1964 година, припадниците на генерацијата „бејби-бум“ сочинуваат најголем дел од денешните баби и дедовци. Нивните деца, кои во најголем дел се милениумци, моментално се на возраст кога ги одгледуваат сопствените деца.

Секоја генерација носи специфични карактеристики, што значи дека бумерите ги внесуваат сопствените верувања и вредности и во улогата на баби и дедовци, а тоа директно го обликува односот што го имаат со своите внуци.

Заеднички карактеристики на генерацијата „бејби-бум“

Иако генерациските црти не важат за секој поединец, експертите ги издвојуваат следниве општи одлики:

• Кариера: Силно се фокусирани на работата и градењето кариера.
• Независност и снаодливост: Ја ценат личната независност. Често се опишуваат како дисциплинирани, амбициозни и натпреварувачки настроени.
• Приспособување на технологијата: Иако претпочитаат личен контакт, тие се подготвени да ги совладаат современите технологии и редовно ги користат социјалните мрежи.
• Оптимизам: Поседуваат генерално позитивен поглед на животот бидејќи израснаа во период на економски соживот и социјални промени.
• Отпор кон промени: Понекогаш знаат да бидат чувствителни на критика и критички се настроени кон поинаквите ставови.
• Семејна ориентација: Повеќе се фокусирани на семејството во споредба со претходните генерации.

Како се однесуваат како баби и дедовци?

1. Ги разгалуваат внуците со подароци и играчки

Многу баби и дедовци се фокусирани на задоволувањето на физичките потреби на внуците, што е директно поврзано со нивното детство. За време на нивното растење, општеството беше преокупирано со сигурноста за храна и покривот над глава.

Поради тоа, тие ставаат поголем акцент на материјалните отколку на емоционалните потреби. Кога ги купуваат сите тие играчки, тоа не го прават од недостиг на емоции, туку се обидуваат на внуците да им го овозможат она што им недостигало во сопственото детство.

2. Помагаат во чувањето на децата

Податоците покажуваат дека голем дел од родителите се потпираат врз бабите за чување на децата, особено поради високите цени на градинките и деловните обврски.

Сепак, кај некои семејства ова не е случај бидејќи голем дел од бумерите работат подолго и ја одложуваат пензијата, па имаат помалку слободно време.

3. Користат технологија за одржување контакт

Поради тоа што многу баби и дедовци денес живеат подалеку од своите внуци, тие редовно користат видеоповици и социјални мрежи за да останат во секојдневен контакт. Сепак, бидејќи сè уште високо го ценат личниот контакт, тие уживаат во заеднички излети, одење во кино или во музеј.

4. Ги слават успесите и достигнувањата

Со оглед на тоа што се фокусирани врз целите и кариерата, тие исклучително го ценат училишниот успех и образованието. Гордо присуствуваат на сите настани каде што се прославуваат успесите на нивните внуци, иако понекогаш знаат да бидат строги кога децата се соочуваат со неуспех или предизвици.

Извор