Да ја разгледаме разликата помеѓу тоа да мислите дека сте талентиран спортист и да бидете самоуверен натпреварувач. Разликата лежи во вашиот начин на размислување, што влијае врз вашиот пристап кон натпреварите и вашето ниво на перформанси. Мислењето дека сте талентирани е првенствено процена на вашите физички способности. Вие препознавате дека поседувате физички предности, технички вештини или природен атлетизам. На пример, талентиран спортист може да помисли: „Имам одлична брзина“, „Имам добра механика“ или „Јас сум физички силен“. Иако препознавањето на вашиот талент може да придонесе за позитивен поглед на себе, самиот талент не гарантира самодоверба која треба да се поддржи под притисок.

Спортистите на кои целиот живот им било кажувано дека се физички надарени лошо реагираат кога ќе направат неколку грешки, им опаѓа менталната кондиција или чувствуваат дека ќе се соочат со тешка конкуренција. Овие натпревари или борби ги тераат да се запрашаат дали некогаш ќе го достигнат својот потенцијал.

Да се биде самоуверен натпреварувач, значи да имате непоколеблива верба во вашата способност да одговорите на предизвиците, да настапувате под притисок и да пронајдете начини да успеете без оглед на околностите. Самоуверените спортисти не само што го препознаваат својот талент, туку имаат и длабока верба во себе дека ќе се приспособат и ќе се натпреваруваат без оглед на тоа каква е ситуацијата. Тие очекуваат предизвици, ги гледаат грешките и неуспесите како проблеми што треба да се решат и веруваат во својата способност за приспособување. Комбинацијата од препознавање на вашиот талент и верба во вашата способност да се натпреварувате го менува начинот на кој пристапувате кон натпреварувањето. Најуспешните спортисти не се нужно оние што веруваат дека се најталентирани. Тие се оние што веруваат дека ќе се приспособат дури и кога работите не одат според планот.

Затоа во работата на себе фокусирајте се на:

1. Приоритет на градењето самодоверба

Секој ден најдете начин да изградите самодоверба со тоа што ќе се охрабрувате себеси за квалитетен тренинг, ќе развивате ментални вештини, ќе создавате позитивни навики и ќе вежбате под притисок.

2. Очекувајте неволји и непријатности

Сфатете дека грешките, падовите и неочекуваните предизвици се дел од спортот. Кога очекувате неволји, нема да се чувствувате преоптоварени од моментот кога ќе дојдат и ќе бидете подобро оспособени да се приспособите на вашите околности.

3. Фокусирајте се на натпреварување, а не на докажување

За време на натпреварите, фокусирајте се на напорот, носењето одлуки и останувањето ангажирани во сегашноста наместо да се обидувате да докажете кој сте и што умеете.

Автор: м-р психолог Христина Стефановска