Ако ова лето купувате нов костим за капење за вашето дете, освен на големината и на дезенот, советот на експертите е задолжително да обрнете внимание и на бојата. Одредени бои во водата речиси воопшто не се гледаат, додека други можат да ви помогнат за миг да го забележите детето во толпата.

Организација која се занимава со безбедност во вода спроведе низа тестирања во базени, езера и во море за да открие кои бои се највидливи кога детето е во вода, симулирајќи ги реалните услови во кои родителите ги набљудуваат своите деца од брегот.

Кои бои се најдобар избор според местото на капење?

Резултатите покажаа дека видливоста на боите директно зависи од тоа каде се капе детето:

• Во море: Најдобро се гледаат флуоресцентно портокаловата и флуоресцентно розовата боја.
• Во базен: Највидливи се флуоресцентно розовата, флуоресцентно портокаловата и флуоресцентно жолтата.
• Во езеро: Поради потемната и поматна вода, најдобро се истакнуваат флуоресцентно жолтата, флуоресцентно зелената и флуоресцентно портокаловата.

Кои бои се најлош и најопасен избор?

Од друга страна, некои бои се покажаа како исклучително лош и опасен избор бидејќи буквално го прават детето „невидливо“ под површината на водата:

• Бела и светлосина: Ова се најмалку уочливите бои бидејќи целосно се претопуваат со рефлексијата и бојата на водата. Ако детето се најде под вода, со ваков костим за капење е речиси невозможно да се забележи од брегот.
• Црна боја: Може добро да се види на базен, но само ако дното на базенот е совршено бел и чист. Во сите други услови, особено во езера и море, и црната боја станува целосно невидлива.

Бојата на костимот не е замена за родителскиот надзор!

Иако изборот на силни, флуоресцентни бои може многу да ви помогне побрзо да го лоцирате детето во водата, експертите предупредуваат дека тоа никогаш не може да го замени будното око на родителот.

Без оглед на бојата на костимот, доколку детето не е искусен и сигурен пливач, мора да го држите под постојан надзор. Податоците на Светската здравствена организација покажуваат дека давењето е трет водечки причинител за смрт од ненамерни повреди во светот. Затоа, пред да го изберете следниот модел за плажа, размислете за неговата флуоресцентност – во критична ситуација, токму таа силна боја може да ви помогне да реагирате во секунда.

Извор