Нарцисоидниот татко лесно се убедува себеси дека е центарот на семејниот универзум околу кој сè мора да се врти. Неговите потреби и желби се секогаш на прво место, поважни од потребите на кој било друг. Иако однадвор може да изгледа шармантно и привлечно, зад затворени врати неговото однесување може да ја уништи семејната динамика. Често и без да биде свесен за тоа, таквиот татко ги прави своите деца несигурни и отуѓени, а сопругата во постојан режим на преживување.

Создава ривалство во семејството

Наместо да поттикнува тимски дух, нарцисоидниот татко ги претвора членовите на семејството во ривали, охрабрувајќи ги да се натпреваруваат меѓу себе за да види кој е навистина силен.

Секогаш мора да биде во центарот на вниманието

За нарцисоидниот татко, најголем кошмар е да не биде во фокусот. Постојано сака внимание, а ако не го добие, без проблем ќе предизвика сцена или кавга за да ги сврти сите погледи кон себе. Дури и кога некој слави роденден или детето постигнува важен успех, тој ќе најде начин сè да се врти околу него.

Контролира со заплашување и вина

Нарцисоидните личности ги контролираат другите за свои потреби. Најчестите алатки им се наметнување вина и заплашување. Друг начин на контрола е убедувањето дека децата се проблемот. Тој ќе ја искористи нивната емпатија сè додека не се покорат на неговите барања.

Ја искривува реалноста како што му одговара

Не е реткост нарцисоидниот татко да го прекрши даденото ветување или да манипулира со детето за да го убеди дека нешто никогаш не се случило или дека никогаш не го рекол тоа, особено ако вистината не му оди во прилог. Може да ги убеди децата да направат нешто во замена за сладолед, а потоа да тврди дека никогаш не го ветил тоа.

Ја поткопува самопочитта кај децата

Татко со нарцисоидни црти лесно се препознава по тоа што не дозволува никој во семејството да изгради самодоверба. Наместо да ги охрабри за постигнатото, тој повеќе сака да ги истакнува нивните недостатоци за да се чувствуваат помалку вредни.

Сопствените деца ги доживува како закана

Кога нарцисоидниот татко се чувствува загрозен од своите деца, почнува да се натпреварува со нив. Ако децата покажат блискост со мајката, тој не го доживува тоа како нешто позитивно, туку како опасност дека ќе биде „заменет“. Психолозите го нарекуваат ова Лаеусов комплекс, состојба во која таткото ги гледа сопствените деца како ривали.

Ги задушува емоциите

Во дом со нарцисоиден родител покажувањето емоции носи повеќе штета отколку корист. Ако детето заплаче барајќи разбирање, неговата ранливост се претвора во оружје против него. Тој го доживува плачот како слабост, а лутината како непочитување, па наместо утеха нуди срам.

Моќта му е поважна од партнерството

Нарцисоидниот татко никогаш нема да се грижи за некого онолку колку што се грижи за себе. Затоа, семејната динамика на набљудувач отстрана секогаш му е чудна. Тој не ја доживува сопругата, ниту децата како рамноправни, бидејќи сака да ја задржи контролата.

Неговата љубов секогаш е условена

Во очите на нарцисоидниот татко љубовта мора да се заслужи. Одобрување и, ретко, нежност се добиваат само ако детето направи нешто што му одговара на таткото или ги исполнува неговите очекувања. Ако го разочара, ќе го казни со игнорирање, однесувајќи се како детето да не постои.

Никогаш не презема одговорност

Нарцисоидниот татко никогаш нема да признае грешка. Наместо тоа, ќе направи сè за да ја префрли вината на некој друг. Со текот на времето семејството учи дека од него е бесмислено да се очекува извинување.

Растењето со нарцисоиден татко може да остави сериозни и долготрајни последици. Децата на такви родители често имаат потреба од стручна помош или терапија за да се ослободат од токсичните обрасци што им биле всадени од најрана возраст. Препознавањето на овие знаци е првиот чекор кон заздравување и прекинување на циклусот на генерациска траума.

Извор