Ако вашите деца постојано се расправаат, не сте сами. Но, постојат неколку родителски трикови што можат да помогнат децата подобро да се разбираат и поретко да се караат.

Добрата вест е тоа што постојат мали, но моќни родителски навики кои можат да им помогнат на вашите деца да станат сојузници наместо ривали. Еве што најчесто прават родителите кои ретко слушаат детски кавги и расправии.

Постапуваат праведно, но не секогаш еднакво

Ова можеби звучи чудно, но децата не бараат целосно еднаков третман, туку бараат правичност и праведност. Секое дете има свои потреби, темперамент и начин на изразување. Кога родителите го приспособуваат својот пристап кон секое дете поединечно, децата се чувствуваат видени и сакани, што ја намалува потребата за натпреварување.

Ги слушаат децата без осуда

Признајте, и вие барем еднаш сте влегле во расправија и веднаш сте го означиле „виновникот“. Но кога ќе им дозволите на децата да ја раскажат својата верзија и навистина ќе ги слушате, им отворате простор за разбирање и соработка.

Ги вклучуваат децата во решавањето на конфликтите

Наместо секогаш вие да бидете „судија“, речете им сами да предложат решенија.
Запишете ги идеите и одлучете што е фер. Така децата учат да преговараат, да носат одлуки и да преземаат одговорност – вештини кои ќе им бидат од корист и кога ќе пораснат.

Не ги споредуваат децата

„Зошто не можеш да бидеш повеќе како сестра ти?“ – ви звучи познато? Таквите реченици оставаат длабока трага и го зголемуваат ривалството. Наместо тоа, фокусирајте се на однесувањето, а не на споредбата, и прифатете ја уникатноста на секое дете.

Поттикнуваат тимска работа и заеднички цели

Децата се поврзуваат повеќе кога работат заедно. Заеднички задачи, игри во кои се на иста страна, па дури и мали предизвици со награда, сето тоа помага да почнат да функционираат како тим.

Понекогаш ги оставаат сами да ги решат несогласувањата

Звучи ризично, но не е секогаш лошо да им дозволите самите да најдат решение, секако, под ваш надзор. Кога ќе видат дека им верувате, и тие почнуваат да веруваат повеќе во себе.

Ги учат како да зборуваат за своите чувства

Кога децата ќе научат на убав начин да ги изразуваат своите емоции и потреби, расправиите стануваат поретки, а односот потопол.

Извор