Признавам. Со оглед на тоа што пораснав со исклучително блиска врска со сопствената мајка, не можев ни да замислам да го немам истиот однос и со мојата ќерка. Додека децата се мали, физичката близина е природна. Но, како што влегуваат во тинејџерските години, нивниот свет станува сѐ поголем, тука се училиштето, другарките, спортот и сите нивни лични обврски.

Па, како да ја одржите таа силна врска? Лично, верувам во моќта на семејните ритуали. Но, бидејќи имам и син и ќерка, знаев дека ми е потребен посебен ритуал „еден на еден“ само за нас двете.

Така, уште кога таа беше помала, го измислив нашиот саботен ритуал кој го практикуваме и денес, кога таа веќе има 16 години.

Нашата саботна „Гилмор девојки“ традиција

Секоја сабота наутро, додека татко ѝ и нејзиниот помлад брат се зафатени со фудбалските тренинзи, ние двете тргнуваме на нашите таканаречени „обврски низ град“.

Секако, попатно завршуваме и неколку реални обврски, но главниот дел од утринското патување е нашата потрага по најдоброто кафе, најновото тренди печиво или популарно смути.

Приказната оди вака:

1. Избор на локација: Штом ќе влеземе во автомобилот, одбираме кафуле или пекарница каде што претходно не сме биле или сме виделе нешто вкусно на социјалните мрежи.
2. Разговор во автомобилот: Додека се возиме, опуштено разговараме за изминатата недела. Тоа е вистински женски разговор каде што таа слободно ги споделува сите свои мисли.
3. Заеднички моменти: Откако ќе го земеме омиленото кафе, некогаш седиме во кафулето, а некогаш се враќаме во автомобилот. Некогаш разговараме за длабоки животни теми, а некогаш таа ми ги покажува работите што ги зачувала на социјалните мрежи, од идеја за фризура и шминка до места кои сака да ги посетиме.

Не е важно за што разговарате, туку дека сте ЗАЕДНО

Понекогаш нашите разговори се длабоки и сериозни, а понекогаш се сосема лесни и се вртат околу сјаеви за усни и нега на кожа. Но, тоа воопшто не е важно. Суштината е во физичката близина, посветеното време и заедничката навика.

На поголемите деца и тинејџерите им се потребни ритуали исто толку колку и на малите деца. Овие саботни утрински прошетки ни помагаат да останеме поврзани на долг рок и се надевам дека мојата ќерка и во иднина ќе ужива во овие мали кафе-авантури со мене исто колку што уживам и јас.

Извор