Билјана Борзан, постојан известувач на Европскиот парламент за безбедност на храната, изјавила дека и Бугарија се приклучува кон земјите што ја забрануваат продажбата на енергетски пијалаци на деца.

Во Хрватска, на пример, сè уште не е донесена таква забрана, иако научниот и политичкиот консензус за штетноста на овие пијалаци за малолетници станува сè посилен.

Борзан смета дека одлуката за забрана на енергетски пијалаци за деца и млади е непотребно одложувана во некои земји, на штета на децата.

Сè повеќе земји воведуваат забрани од здравствени причини

Земјите на ЕУ имаат право да ја забранат продажбата на енергетски пијалаци на деца за да го заштитат јавното здравје, а сè повеќе од нив ја користат. Литванија и Латвија ја воведоа забраната пред десет години, а сега им се придружува и Бугарија. Во Унгарија, забраната е во сила од почетокот на јуни.

Денес, според неа, дискусијата повеќе не е за истражување, туку за факти: на пример, дури 86 % од шеснаесетгодишниците во Хрватска консумираат енергетски пијалаци, а речиси половина од нив ги пијат заедно со алкохол. Загрижувачки е и фактот дека повеќе од половина од децата под 12 години веќе ги пијат овие пијалаци.

Бројот на деца со прекумерна тежина, зависност од кофеин и ризично однесување поврзано со консумирањето на овие пијалаци се зголемува секој ден.

Во Србија пак, енергетските пијалаци се консумираат без контрола и без никакви забрани, а последиците можат да бидат многу сериозни. Една лименка енергетски пијалак содржи од 80 до 300 мг кофеин. Додека возрасните можат да консумираат до 200-300 мг дневно, што е како две шолји кафе, ситуацијата е поинаква за децата.

Според податоците од Европската агенција за безбедност на храната, 68 % од младите луѓе на возраст меѓу 10 и 18 години консумираат енергетски пијалаци, како и 18 % од децата под десет години, иако на лименката пишува дека се наменети за лица над 18 години.

Не постои официјална горна граница за внес на кофеин за деца под 13 години, но Американската педијатриска асоцијација советува дека децата на возраст од 8 до 13 години можат да консумираат до 100 мг дневно, забележувајќи дека кофеинот не е присутен само во енергетските пијалаци и кафето.

Повеќето малолетници барем еднаш пробале енергетски пијалак, иако многумина не сакаат да го признаат тоа. Прекумерната употреба може да предизвика несоница, нервоза, дебелина, срцеви проблеми и негативно да влијае врз менталното здравје. Најопасна е комбинацијата со алкохол, што е честа појава на забавите.

Експертите сметаат дека е потребно да се воведе законска регулатива што би ја ограничила или целосно би ја забранила употребата на овие производи од страна на децата и младите.

Извор