Пожелно е да се пофалат децата за нивните достигнувања и одредени работи што ги прават, но прекумерната пофалба всушност може да има негативно влијание врз нивната самодоверба. Така тврди социјалниот работник и специјалист за детски развој Клер Лернер, која смета дека родителите треба умерено да ги фалат децата за подоцна тоа да не им се удри од глава.

Таа истакнува дека прекумерната пофалба може да ги наведе децата да се потпрат на надворешна валидација за да се чувствуваат добро за себе. Тие, исто така, може да почнат да доживуваат анксиозност за перформансите и да имаат проблем да го прифатат фактот дека не се секогаш во право или совршени.

Друг проблем поврзан со прекумерната пофалба на децата е фалењето.

-Прекумерната пофалба може да ги поттикне да станат фалбаџии, што може негативно да влијае врз нивните социјални односи – додава Лернер.

Присутен е и фактот дека ваквите деца често мислат оти треба да бидат најдобри и се плашат дека ако не исполнат одредени цели, ќе ги разочараат родителите и ќе бидат помалку ценети и сакани од порано. Исто така, ако децата се претерано фалени, тие може да имаат тешкотии да прифатат корекции и да инсистираат дека се во право, дури и кога е очигледно дека не се во право.

Што да направите ако прекумерната пофалба има негативно влијание врз децата?

Лернер истакнува дека има неколку работи што родителите треба да ги направат ако увидат дека нивната пофалба всушност лошо влијаела врз однесувањето на нивните деца.

Префрлете го фокусот од пофалби на процес: коментирајте го ефектот на нивниот напор врз нив, а не врз вас. Кажете: „Работеше напорно за да ја следиш топката и тоа ти помогна да го постигнеш тој гол што навистина ти се допадна“, наместо „Постигна многу голови, многу сме горди на тебе!“

Признајте дека е тешко да не бидете секогаш најдобри или победници: ова е нешто со кое сите се бориме. Мораме да научиме како да управуваме со таквите моменти ако сакаме да бидеме добри соиграчи и да им дозволиме на нашите пријатели да се чувствуваат добро во нашето друштво.

Кога децата се фалат премногу, не критикувајте ги: тоа ги засрамува и речиси секогаш ги наведува да се „заплеткаат“ повеќе во сопствените приказни. Наместо тоа, одговорете со тоа што ќе ја препознаете нивната желба: „Ти сакаш да постигнуваш многу голови“.

Кога вашето дете дава невистинити тврдења, не поправајте го: Ова ги става децата во непријатна положба, а потоа тие ќе ја бранат својата позиција уште пожестоко, често користејќи нелогични аргументи. Наместо тоа, обидете се со: „Интересно. Имам различни информации за тоа“, и дајте ваше објаснување. Ова прави да биде поверојатно дека детето ќе ги обработи информациите што ги споделувате, иако можеби нема да го признае тоа. Можете, исто така, да предложите заедно да истражувате одредена тема. Колаборативно пристапување кон проблемот, без срам или нагласување кој е во право или не, може да им го отвори умот на децата за учење.

Извор