Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Син ми има 11 години, ученик е во шесто одделение, но никако не покажува интерес, ниту желба за учење. Носен е на сите прегледи и процени и велат дека сѐ е во ред, но тој се инаети и ништо не учи. Дури не памети што работеле на час, ниту што има за домашна. Инаку е релативно добро дете, не прави проблеми и многу е оптоварен со тоа што има слаби оценки, но ништо не презема за да се смени. Сме пробале и со наставници за дополнителна работа, но ништо.

ОДГОВОР: Мотивацијата за учење доаѓа од добрата слика за себе, добра самодоверба и позитивен начин на кој дете се гледа и доживува себеси во однос на постигнувањата, при што учењето го користи да ја јакне својата амбициозност и да ги тестира своите сили и способности за кои верува дека е доволно добро.

Колку што можам да разберам од напишаното, вие досега сте барале одговори за тоа од каде потекнува изворот на проблемот и од прегледите кои се направени е установено дека не постои биолошка или развојна диспозиција кај детето за отпорот кон учењето. Поради тоа, потребно е да се направи психолошка процена и семејно системска процена, како и разгледување на родителските аспекти и приодот кон учењето уште од најрана возраст, со што би се установиле дополнителни информации кои би помогнале во интервенирање на дадената состојба.

Одговара: Христина Стефановска, психолог за деца и адолесценти, Здружение „Хармоничен свет“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.