Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Син ми има 11 години и последнава година е многу нервозен и несигурен во себе. Кога почнува да учи, тоа секогаш е со плачење и мисли дека нема да научи. Секогаш мора на негово прашање да му се одговори по три пати. Кога се спрема за на училиште на глас по три пати повторува дали има спремно сѐ. Сѐ уште не сака да спие сам и не сака да излегува надвор со деца затоа што го навредувале.

ОДГОВОР: Детето кое е несигурно во себе е дете кое ја перципира надворешноста како опасна и извор на непријатности, а стравот што таа му го предизвикува го регулира преку постојано преиспитување, недоверба и регресивно однесување. Во вашето прашање споделувате дека тој сѐ уште не е сепариран од вас во однос на спиењето, што дополнително го отежнува неговиот процес на личен раст и развој и психолошки напредок.

Детето на оваа возраст мора да чувствува психолошка самостојност и физичка независност со цел да ги осознава своите сили и способности. Затоа е потребно ваше охрабрување и настојување тој да спие сам и да ги надминува своите непријатни мисли креирајќи здрави мисли во својот ментален склоп. Потоа се наметнува темата зошто баш кон училиштето доживува најголема вознемиреност и страв од неуспех кој го контролира преку повторување на нештата. Овде е вредно да се преиспитаат барањата и критериумите што вие ги имате поставено кон неговите училишни постигнувања. Колку се тие во поголем расчекор од реалните можности, толку е поголем стравот до нивно постигнување. Препорачувам да направите родителско советување и секако, третман за вашето дете со стручно лице, како психолог и психотерапевт за деца.

Одговара: Христина Стефановска, психолог за деца и адолесценти, Здружение „Хармоничен свет“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.