Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Многу сум загрижена за однесувањето на моето дете во училиште, од оваа година е прваче. Се работи за дете-единец, кое дома е релативно послушно, не можам да се пожалам, освен што во повеќето случаи сака да е сѐ по негово, но ние како родители се обидуваме на најдобар начин да го избалансираме тоа. Откако тргна во школо, дома не покажува промена во расположението, мирен е, сталожен е, но во училиште не може да издржи и почнува да покажува агресија, да ги задева другарите, да станува и да шета низ училницата. Ја попречува наставата, прави секакви глупости за вниманието да биде насочено кон него. Ова се случува во втората половина од денот кога најверојатно му паѓа концентрацијата, но не се случува секојдневно. Да напоменам дека четири години одеше во градинка и ги немавме овие проблеми. Ве молам за совет како да му помогнеме.

ОДГОВОР: Како што можев да разберам од вашето прашање, се работи за дете кое е на шестгодишна возраст, кое дома е релативно послушно, но во повеќето случаи сака да е по негово. Дома некако тоа умеете да го избалансирате, но проблемот се јавува кога тој е на училиште. Во училиште манифестира недисциплинираност, потреба од поголемо внимание и наклонетост.

Во таа насока најнапред треба да ги разгледате од почеток правилата и границите што му ги поставувате во домот. Да дефинирате правила на кои ќе инсистирате да се придружува секој од членовите на семејството. Правилата мора да важат секогаш и во секое време. Тоа ги прави доследни и резистентни на промени од страна на детето.

Потоа е важно што и колку дозволувате низ домот, односно што може и што не може да се прави и колку дозволувате вашите граници да се поместуваат во прилог на детето. Некогаш родителите си велат само за да јаде детето, во ред е ако го прави тоа и на под, на кревет, со телефон, но на тој начин не наметнуваат правило дека оброците се јадат на маса и се седи на стол, а со тоа детето учи дека правила не постојат, правилата ги поставува тоа.

Потоа е важно да го поттикнувате и пофалувате пожелното однесување и дисциплинираноста, да го користите секој момент да му покажете дека во него гледате дете кое умее да ги контролира сопствените емоции и секој ден е сѐ подобро во тоа, дете кое ги почитува возрасните, кое умее да сослуша, но и сака да биде сослушано.

Одговара: Христина Стефановска, психолог за деца и адолесценти, Здружение „Хармоничен свет“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.