Што да му кажете на анксиозно дете кога не може да заспие?
Неможноста за спиење кај децата може да биде предизвикана од многу работи, премногу енергија, доцно легнување в кревет, глад или жед. Но, кога детето не може да заспие поради анксиозност и грижи, соочувањето станува посебно тешко за секој родител.
Во желбата да го утешиме, повеќето од нас несвесно ја прават истата грешка: му ја кажуваат погрешната реченица на своето дете.
Која е грешката што сите ја правиме?
Д-р Хана Самаха, детски психолог специјализиран за анксиозност и АДХД, открива дека реченицата што мора веднаш да престанеме да ја користиме е:
„Сигурно ќе заспиеш. Не грижи се, ти секогаш заспиваш!“
Иако нудењето утеха изгледа како најприродната работа што еден родител може да ја направи, д-р Самаха предупредува дека со ова несвесно се влегува во затворен круг на анксиозност.
Кога му ветуваме на детето дека сигурно ќе заспие, му создаваме зависност од нашите зборови. Детето почнува да верува дека му е потребна нашата потврда за да се чувствува безбедно наместо самото да научи да се носи со грижите.
Што се случува ако детето сепак не заспие веднаш?
Ако му ветите: „ВИСТИНА, ВЕДНАШ ЌЕ ЗАСПИЕШ“, а тоа и понатаму лежи будно, му испраќате ненамерна порака дека тоа што не заспива е страшна работа со која не може да се справи.
Целта не е детето да лежи само и да се мачи без поддршка, туку да научи дека може да ја почувствува анксиозноста, да ги употреби своите вештини за смирување и да го преброди тоа чувство без потреба родителот да ја отстрани несигурноста.
Формулата што навистина функционира
Наместо да го гарантирате крајниот исход, потврдете ги неговите чувства без ветувања.
Психологот советува да кажете:
„Знам дека се грижиш што не можеш да заспиеш, но исто така знам дека можеш да се справиш со ова чувство.“
Забележете што недостига тука? Ветувањето дека сигурно ќе заспие.
Кога родителите ќе престанат постојано да нудат такви лажни гаранции, децата постепено почнуваат сами да си даваат утеха, а тоа е важната вештина што сакаме да ја развијат за целиот живот.
