Омажените жени се соочуваат со поголем стрес отколку слободните жени. Тие имаат голем товар: работа, родителство и брак. Сопругите што се под стрес често имаат главоболка, уморни се и лути, а и родителството е прилично стресна работа. Изненадува тоа што сопрузите се оние што даваат поголем придонес за стресот на жените отколку децата. Според едно истражување, 46 отсто од жените велат дека децата им создаваат помалку стрес отколку нивните сопрузи, а стресот воопшто не е поврзан со неверство или малтретирање. Зошто?

1. Сопругот се однесува како уште едно дете

Вистината е дека мажите се однесуваат како деца до нивната 43-та година. Ова се изразува не само преку нивниот несериозен став кон некои прашања, туку и преку нивната интеракција со децата.

– Седумгодишно дете е седумгодишно дете. Но, 35-годишен маж што се однесува како седумгодишно дете е многу постресно бидејќи тој треба да знае подобро – вели еден од испитаниците за време на истражувањето.

Татковците повеќе се забавуваат со нивните деца. Како последица на тоа, таткото се перципира како пријател и соучесник со забавни идеи и дозволува сè. Мајките повеќе се занимаваат со работи поврзани со воспитувањето, дисциплината, здравјето и образовниот развој на детето. Жените повеќе ја следат секојдневната рутина на децата, им даваат инструкции и забрануваат многу работи. Токму поради тоа, мајката е строгиот родител. Ова влијае врз односот со децата и може да доведе до конфликт меѓу родителите.

Решение:

Подобро е да се држите до единствен став. Ако еден родител му забранува нешто на детето, тогаш вториот треба да ја поддржи оваа одлука. Неопходно е да дејствувате заедно и да се согласите за тоа што ќе забраните, а што ќе дозволите. Исто така, важно е еднакво да ги поделите одговорностите за дневната грижа за децата.

2. Домашните обврски на жената се премногу

Истражувањето покажа дека една од пет мајки вели дека немањето доволно помош од сопругот е главен извор на секојдневен стрес. Жените трошат повеќе време на домашните обврски, додека мажите поминуваат повеќе време релаксирајќи се. Женските должности не вклучуваат само готвење и чистење, туку и плаќање сметки, купување намирници и планирање на буџетот.

Ова не е најлесна и најпријатна работа. Извршувањето на домашните обврски предизвикува поголем стрес отколку канцелариската работа. Ако жената се грижи само за домаќинството, нејзиниот стрес се зголемува.

Решение:

Наједноставниот и најочигледен одговор е дека сопругот може да помогне со домашните обврски. Одговорностите поделени еднакво во домаќинството се една од главните причини за успешен брак.

3. Жената се чувствува виновна и нема слободно време

Со оглед на сите обврски на жените, тие може да се чувствуваат како да немаат доволно слободно време. Особено ако тие работат полно работно време. Навечер, по работата, тие треба да обрнат внимание на секој член од семејството и да ги извршат нивните домашни обврски. Ова чувство води кон стрес. Тие се обидуваат да направат сè во рок од 24 часа, но поради брзањето, понекогаш прават грешки.

Одговорноста за децата, сопругот и домашните обврски се на товар на жената и таа може да се чувствува виновна кога нешто ќе тргне наопаку. Стресот може да биде предизвикан од чувството на вина.

Решение:

За жената да не биде под стрес поради недостиг на време и поради вина, сопругот може да ѝ помогне во домашните обврски и во грижата околу децата и да преземе поголема одговорност за семејството како целина.