Донесувањето нов живот во светот е неверојатно, без оглед на вашата исхрана. Сепак, бременоста и подготовките за породување може да се различни кај мајките што се веганки, пишува Емили Фолк за специјализираниот новозеландски магазин за родителство „Нејчарал перант“. Емили Фолк е писателка, фриленсерка и основач и уредник на порталот „Конзервејшан фолкс“.

Ќе слушнете дека треба да се откажете од идејата за ваква исхрана во текот на бременоста, но тоа воопшто не е вистина. Наместо тоа, вашиот вегански животен стил може да биде здрав и за вас и за вашето бебе, сè додека сте свесни за тоа што јадете до денот на породувањето.

Еве што треба да знаете:

Можете да останете веган

Некои луѓе може да се обидат да се вратат на традиционалната исхрана. Сепак, експертите тврдат дека можете да продолжите со ваквиот вид исхрана сè додека ги внесувате потребните хранливи материи.

Следете го внесувањето на хранливите материи

Како веган, осигурете се дека ги следите сите внесувања на хранливи материи, како омега-3 масни киселини, Б12 и железо, затоа што тие се важни без оглед дали сте или не сте бремени. Но, сега треба да бидете дополнително внимателни за тоа што јадете.

Протеини

Треба да внесувате приближно 75 грама протеини секој ден. Протеините помагаат во растењето на клетките и регулацијата на хормоните.

Ова е исхраната што ви помага да внесете протеини:

Леблебии
Киноа
Тестенини од цело зрно
Грашок (чие семе е сушено, излупено и поделено)
Леќа
Семе од коноп
Тофу
Јаткасти плодови
Грав

Калциум

Тешко може да им биде на веганите кога станува збор за внесувањето калциум бидејќи најчесто луѓето го добиваат од млечни производи. Сепак, на вашето бебе му треба оваа хранлива материја додека се развиваат неговите коски. Калциумот е клучен во изградбата на мускулите, нервите и срцето. За среќа, постојат вегански извори на калциум – млеко од соја, сок со калциум, тофу и зелен зеленчук.

Железо

Вашето тело го зајакнува снабдувањето со крв додека сте бремени, така што оваа хранлива материја игра клучна улога во производството на црвени крвни зрнца.

Можете да консумирате додаток на железо по 27 милиграми секој ден, а можете и да консумирате храна богата со железо:

Едамаме
Алги
Семки од тиква
Суво овошје
Грав
Спанаќ
Овесни житарки

Витамин Б12

Витаминот Б12 и фолната киселина го зајакнуваат развојот на мозокот на вашето бебе. На црвените крвни клетки им е потребен Б12. Потребни ви се 2,6 мг секој ден во текот на вашата бременост. Обично го добивате од пренаталниот витамин, па затоа прашајте го вашиот доктор пред да почнете да внесувате храна богата со Б12, како што се квасец и млеко од соја.

Витамин Д

Витаминот Д е потребен за растот на забите и коските на вашето бебе. Можете да го добиете седејќи на сонце неколку минути, а можете и да го пиете како додаток.

Може да добиете желба за јадење месо

Не чувствувајте се лошо ако имате желба да јадете месо во текот на бременоста. Нема да бидете прва и единствена.

Ако сакате, можете да направите исклучок додека сте бремени. Истото важи и за други производи од животинско потекло кои ќе направат да се чувствувате подобро и ќе ги задоволат вашите потреби. По раѓањето, секогаш можете да се вратите на веганството.

Штом ќе пристигне бебето, и понатаму ќе треба да ја следите вашата исхрана доколку доите. На пример, ќе треба да го следите внесот на витамин Д и Б12.

Автор: Емили Фолк

Извор



912

X