Верувам дека на крајот од септември сите седум деца што имаат спинална мускулна атрофија ќе го добијат лекот „спинраза“, истакна министерот за здравство Венко Филипче, кој присуствуваше на втората годишна средба на специјалисти и семејства на пациенти со спинална мускулна атрофија (СМА) и промоција на книгата: „Водич во меѓународните стандарди за нега на СМА“.

Тој посочи дека е почната постапката, техничкиот дијалог е завршен и сега го отвораат тендерот.
– Направивме пренамена на дел од средствата за оваа година со цел да ја почнеме постапката и сега добиваме пари со ребалансот за да може да продолжиме. Верувам дека на крајот од септември пациентите ќе го добијат лекот – рече Филипче.

Потенцира дека имале состанок со претставници на МАНУ, со нивната истржувачка лабораторија каде што се прават дел од анализите, тие дале барање за зголемување на буџетот со цел воведување нови анализи.

– Заедно со експерти од повеќе области ќе зборуваме дали нешто екстра треба да се направи и во таа смисла да го зајакнеме скринингот поради тоа што тоа е суштината – нагласи тој.