Кога пребарувате низ социјалните медиуми, веројатно ќе наидете на симпатични фотографии од деца – од првите чекори до роденденски забави и тргнување на училиште. Но, се појавува поинаков тренд: родители кои го покриваат лицето на своето дете со емотикони. Срца, сонца, панди, мачки – сè е дозволено, сè додека лицето не е видливо.

Овие родители често се соочуваат со критики. Некои ги обвинуваат дека се премногу заштитнички настроени, други им се потсмеваат дека претеруваат. Но, во време кога секој клик остава дигитален отпечаток, тие можеби се еден чекор понапред.

„Страшно е колку малку контрола имаме откако ќе објавиме нешто“

Лорен Флауердеј, консултант за личен брендинг и мајка на едно дете, од самиот почеток знаела дека нема да го објави лицето на својот син. Таа вели дека тоа било повеќе инстинкт отколку свесна одлука, но дека со текот на времето се убедила себеси дека постапила правилно.

-Работев со инфлуенсерка која имаше над 200.000 следбеници. Во еден момент на нејзиното дете ѝ пристапи непознат човек на улица – човек кој ја следеше на „Инстаграм“ ѝ го препозна детето – рекла таа.

По тоа искуство, Флауердеј ги заострила своите правила уште повеќе. Таа објавува фотографии од рацете и стапалата на нејзиниот син или става срце на неговото лице. Во последно време, таа дури размислува да не објавува никакви слики воопшто.

-Сакам тој да има право да одлучи кога ќе порасне што сака и со кого сака да го сподели тоа – рекла таа.

Деца со дигитални отпечатоци – и оние без

Експертите се согласуваат дека споделувањето фотографии од вашето дете носи ризици. Мира Кан, клинички психолог, предупредува дека тоа може да ја наруши приватноста на детето, да го изложи на несакано внимание и да влијае врз неговиот емоционален развој.

Британи Ален, експерт за онлајн безбедност, вели дека комбинацијата од име, датум на раѓање, фотографија и локација, може да биде доволна за да се изврши кражба на идентитет. Ваквите случаи не се невообичаени и честопати остануваат незабележани со години.

Од друга страна, споделувањето фотографии од деца е единствениот начин за многумина да останат поврзани со роднините што живеат далеку. Психологот Џозеф Лаино забележува дека објавувањето помага во одржувањето на контактот и споделувањето важни моменти со бабите и дедовците, или пријателите.

Сепак, сè повеќе млади луѓе сега се соочуваат со последиците од родителското „прекумерно споделување“, односно прекумерно споделување на социјалните мрежи. Некои бараат од своите родители да ги отстранат сликите, други мора да се справат со непријатни коментари или стари објави што влијаат врз работата и врските.

Дали постои безбеден начин за споделување?

Ако сакате да споделувате фотографии или информации за вашето дете на социјалните мрежи, експертите препорачуваат:

-Не објавувајте ги целосното име, училиштето и адресата.
-Не откривајте ја локацијата или карактеристиките на училиштето.
-Поставете го вашиот профил со опција „приватен“ и редовно чистете ја вашата листа на следбеници.
-Исклучете ја вашата локација пред да објавувате.
-Размислете за испраќање слики до најблиските во порака, наместо јавно да ги објавувате.

-Наша одговорност е да ги заштитиме. Тие се премногу млади за да одлучат дали сакаат да бидат на интернет – заклучува Лаино.

Извор