Во последниве години трендот е децата порано да тргнат на училиште. Но, тоа не е секогаш оправдано. Децата родени во различни месеци од истата година често се на различни нивоа на развој, а за многу од нив учењето станува сериозен стрес.
Еден од проблемите со тргнувањето на училиште е недостиг на емоционална зрелост. Според податоците од „Харвард“, децата што тргнуваат на училиште пред своите врсници имаат 30 отсто поголема шанса да им биде дијагностицирано АДХД (нарушување на хиперактивност и дефицит на внимание) во споредба со нивните малку постари врсници.
Во последните 15 години бројот на деца со оваа дијагноза во САД постојано расте. Од 2004 до 2015 година бројот се зголемил за 42 отсто. Покрај тоа, просечната возраст на дијагностицирање е седум години, а една третина од случаите со АДХД биле дијагностицирани пред шестгодишна возраст. Родителите обично одат на лекар самостојно, а во третина од случаите наставниците или воспитувачите изразиле загриженост.
Поради наглото зголемување на бројот на дијагностицирани, се поставуваат прашања за тоа колку се навистина сигурни дијагнозите. Наодите на „Харвард“ за врската меѓу дијагнозата на АДХД и раното тргнување на училиште, всушност, може да ни покажат дека не станува збор за АДХД, туку за недостиг на подготвеност за училиште на рана возраст.
– Нашите резултати укажуваат на можноста голем број деца да бидат дијагностицирани и да започнат со третман на АДХД не затоа што имаат нарушување, туку затоа што тие се релативно незрели во споредба со нивните соученици – вели Тимоти Лејгтон, автор на студијата.
Разликата помеѓу децата родени во различни периоди од годината може да се види и со голо око. Понекогаш разликите се мали, но понекогаш се големи. По достигнувањето училишна возраст овие неколку месеци можат да бидат клучни.
На училиште се очекува децата да бидат подготвени да читаат и да пишуваат. Стандардите стануваат поинтензивни, а децата што рано тргнуваат на училиште веројатно не се подготвени за ова ниво на обврски.
Покрај товарот, постојат и други фактори. Претшколските деца не можат да седат мирно повеќе од 20 минути. Сепак, поголемиот дел од денот го поминуваат седејќи на училиште. Дете што наполнило шест години ќе има повеќе проблеми со седењето подолг временски период од дете што има речиси седум или дури осум години.
Да, тие можат да го научат тоа, но ќе биде потешко и може да потрае подолго. Нивните мали мозоци едноставно не можат да го издржат притисокот. Не е нивна вина, а не е вина ниту на нивните родители. Системот не разбира како се развива детето.
Но, факт е дека многу родители едноставно немаат друг избор освен да ги испратат своите деца рано на училиште. Во многу ретки случаи кај оние деца што се видливо понапредни од нивните врсници и се досадуваат во градинка (а има многу малку такви деца), одењето на училиште порано е вистинскиот потег. Во огромен број случаи подобро е да се почека детето да тргне на училиште со своите врсници, секогаш кога е можно.
912