За време на бременоста, телесната температура природно е малку зголемена, па летните горештини можат да предизвикаат дополнителен замор и непријатност. Со помош на неколку едноставни правила лесно можете да го заштитите вашето здравје и здравјето на бебето.

Златни правила за разладување и заштита

• Избегнувајте да излегувате од дома во најтоплиот дел од денот: Ако работите, разговарајте со работодавецот за опцијата да работите од дома за време на екстремни горештини. Дома вклучете клима-уред, а доколку сте надвор, ставајте ладна и влажна крпа на вратот или на челото за брзо разладување.
• Пијте вода пред да ожедните: Жедта е знак дека телото е веќе дехидрирано. Во текот на летото пијте по една чаша вода на секој час. Освен вода, добри се и свежо цедените сокови (на пример, од портокал), млекото и пијалаците што ги надоместуваат електролитите.
• Освежете се во вода: Пливањето во чист базен или мирно море е одличен начин за разладување, а исто така го намалува притисокот врз ишијасниот нерв. Внимавајте на стабилноста при влез во вода и носете гумени папучи ако плажата е со камења.
• Внимавајте со сонцето: Трудниците побрзо добиваат изгореници, а поради зголемениот меланин, лесно може да се појави т.н. „трудничка маска“ (темни дамки на лицето). Задолжително користете крем со висок заштитен фактор (СПФ 30 или 50) и ограничете го времето поминато на сонце.
• Носете лесна и комотна облека: Широките памучни и лесни материјали ќе го спречат појавувањето на топлотен исип, кој кај трудниците најчесто се јавува под градите и под стомакот.

Практични секојдневни совети

• Одмарајте се во текот на денот: Лежете од 30 до 60 минути по работниот ден или за време на паузата.
• Спречете го отокот во нозете: Додека спиете, држете ги нозете подигнати (ставете свиткано ќебе или перница под душекот кај стапалата).
• Облечете поголеми обувки: Носете удобни чевли, по можност за половина број поголеми од вашата вообичаена големина.
• Извадете ги прстените навреме: Направете го ова пред да почнат да ви отекуваат рацете.
• Шетајте навечер: Практикувајте лесни прошетки 2 до 3 пати неделно, но само кога сонцето ќе зајде и кога температурите ќе паднат.

ШТО ДА ИЗБЕГНУВАТЕ?

• НЕ носете тесна облека, особено околу струкот.
• НЕ стојте и не седете премногу долго во една иста позиција.
• НЕ исфрлајте ја целосно солта од исхраната (намалете ја, но не укинувајте ја бидејќи содржи јод, кој е важен за развојот на фетусот).
• НЕ земајте никакви диуретици на своја рака за да ги намалите отоците бидејќи тие можат да предизвикаат загуба на електролити кај бебето.

Извор