Воведувањето разновидна храна во исхраната на детето е од клучно значење за обезбедување оптимален раст, развој и целокупно здравје. Зелката, иако можеби е необичен избор за некои родители, е исклучително здрава намирница која дава голем број придобивки кога е вклучена во исхраната на детето. Еве неколку важни причини зошто треба да размислите за воведување зелка во менито на вашето дете.

За зелката:

Зелката (Brassica oleracea) е растение кое потекнува од семејството „Brassicaceae“. Ова семејство вклучува разновиден зеленчук, вклучувајќи брокула, кељ, карфиол и други сродни растенија. Различни сорти на зелка се развиени преку долг процес на селекција и одгледување за да се задоволат различни вкусови и потреби во различни климатски услови.

Историјата на одгледување зелка има долга традиција и датира илјадници години. Постојат докази дека зелката се одгледувала во древен Египет и Кина пред повеќе од 4.000 години. Овој зеленчук се шири низ Европа преку трговските патишта и станал составен дел од исхраната на многу култури.

Нутриционистичка вредност:

Зелката е зеленчук кој има исклучително висок нутритивен профил и може да обезбеди многу здравствени придобивки, особено во детската исхрана. Богата е со влакна, витамини Ц, К и Б6, фолати, магнезиум и други важни хранливи материи. Овие хранливи материи се неопходни за правилен раст, развој, зајакнување на коските, поддршка на имунолошкиот систем и целокупното здравје на телото. Влакната се важни за здравјето на дигестивниот систем. Зелката, особено киселата, содржи влакна кои го поддржуваат редовното варење и одржувањето на здравата цревна флора. Додавањето зелка во исхраната на децата може да го подобри нивниот имунитет, да го поддржи здравиот раст и развој и да придонесе за целокупното здравје.

Воведување на зелката во исхраната:

Започнете да воведувате зелка кога бебето успешно ќе ги прифати основните житарки, овошјето и зеленчукот. Ова е обично на возраст од околу шест месеци.

Подготовка на зелка:

Зелката можете да ја подготвите со варење или на пареа. Прво исчистете ја и добро измијте ја. Се вари додека не омекне. Потоа изгмечете или изблендирајте до саканата текстура, во зависност од фазата во која се наоѓа бебето.

Комбинации со друга храна:

Комбинирајте ја зелката со друг зеленчук или овошје за да додадете разновидност и да го подобрите вкусот. На пример, варената зелка може да биде вкусна во комбинација со компири, моркови или јаболка.

Бидете свесни за потенцијалните алергии:

Следете ги реакциите на вашето бебе на нова храна. Воведувањето нова храна треба да биде постепено, често во интервали од неколку дена, за да можете да забележите какви било алергиски реакции.

Ограничување на солта и зачините:

На почетокот избегнувајте да додавате сол или други зачини во храната на вашето бебе. Вкусот на бебето ќе се развива и важно е прво да го запознае природниот вкус на храната.

Консултација со педијатар:

Секогаш консултирајте се со педијатар пред да внесете нова храна во исхраната на вашето бебе. Вашиот педијатар ќе ви обезбеди насоки врз основа на индивидуалните потреби и развојот на вашето бебе. Запомнете дека секое дете е уникатно и дека темпото на воведување цврста храна може да варира. Внимавајте на знаците на бебето за уживањето во новата храна и како тоа реагира на неа. Овие упатства служат како општ водич, но индивидуалните потреби и реакции на бебето се клучни.

Еве неколку креативни рецепти кои ќе им помогнат на децата да уживаат во придобивките од зелката.

Пилешки ролни со зелка

Потребни состојки:

-Кисела зелка
-Мелено пилешко месо
-Кромид
-Ориз
-Сос од домати

Подготовка: Пропржете го кромидот, додајте го меленото пилешко месо и динстајте додека не биде целосно подготвено. Во смесата додајте го сварениот ориз и убаво измешајте. Секој лист кисела зелка наполнете го со смесата и потоа ставете ги во плех. Прелијте со сосот од домати и печете во рерна додека не добијат убава златно-кафеава боја.

Салата од зелка и овошје

Состојки:

-Сечкана кисела зелка
-Сечкано овошје по избор (јаболка, киви, портокали)
-Сечкани бадеми или ореви
-Прелив со јогурт и мед

Подготовка: Измешајте ја сечканата зелка со сечканото овошје и ореви/бадеми. Направете прелив од јогуртот и медот, а потоа прелијте ја салатата. Добро измешајте и оставете да отстои неколку минути пред послужување.

Супа од зелка

Состојки:

-Рендана зелка
-Компири
-Моркови
-Кромид
-Сос од домати
-Варено пилешко (по избор)
-Зачини по вкус

Подготовка: Сварете го кромидот, додајте сечкани компири и моркови, па пропржете. Додајте сос од домати, сечкана зелка и варено пилешко. Додајте вода и варете додека зеленчукот не омекне.
Сол и бибер по вкус.

Извор