Енергетските пијалаци се исклучително штетни за сите што ги консумираат, но особено за децата и младите. Според Хрватскиот институт за јавно здравје, најголемиот проблем со овој вид пијалак е неговата висока содржина на кофеин и шеќер, кои кај децата и младите може да доведат до различни несакани ефекти, како што се палпитации, анксиозност, возбуда, кариес, дебелина, дијабетес тип 2, па дури и смрт.

Во некои земји, на пример, во една шпанска провинција, продажбата на енергетски пијалаци на малолетници е забранета, а на сличен чекор се одлучило и основното училиште „Каштањер“ во Пула, Хрватска, кое од почетокот на оваа учебна година им забрани на своите ученици да носат енергетски пијалаци во училиштето. Се поставуваат прашањата зошто се одлучиле на ваква забрана, како реагирале учениците и дали сега забележуваат разлики во нивното однесување.

Енергетските пијалаци имаа видлив ефект врз однесувањето на учениците на час

Ова училиште соопштува дека забележале оти учениците почесто користеле мобилни телефони на часовите и дека сè почесто носеле енергетски пијалаци на училиште. Тоа, секако, освен што е штетно за здравјето, видно влијаело и врз нивната концентрација и однесување на час, па на Наставничкиот совет и Советот на родители одлучиле да забранат носење енергетски пијалаци на училиште, заедно со мобилните телефони.

„Преку Советот на родители ги информиравме родителите за овој проблем, па и тие се договорија да бидат построги по ова прашање. За среќа, не се работи за масовна појава, туку за мали групи, но постоеше ризик другите деца да ги следат и заклучивме дека по сите споменати активности, мора да прибегнеме кон последната, а тоа е забрана – велат од основното училиште „Каштањер“.

Наставниците со својот пример ја покажале важноста на здравата храна и пијалаци

На прашањето дали има протест кај учениците во врска со оваа забрана, од училиштето велат дека нема бидејќи во најголем дел се свесни за штетноста на енергетските пијалаци, но и дека некои поединци го игнорирале тоа бидејќи мислеле дека ништо не може да им се случи. Исто така, велат дека на почетокот на учебната година ги информирале учениците за забраната и санкциите доколку има прекршок, но дека во изминатиот месец виделе оти учениците ја почитуваат оваа забрана. Како дел од превентивната програма, училиштето водело дискусии и едукација, нудело поздрави алтернативи преку училишни закуски и спортски настани, каде што се поттикнувала консумација на вода и 100 отсто природни сокови. Исто така, ги поттикнале учениците да поминуваат време на отворено, а наставниците со својот пример ја покажале важноста од консумирање здрава храна и пијалаци.

„Учениците се повеќе фокусирани на лекциите отколку порано“

Поради сето ова, учениците навистина го промениле начинот на исхрана, па од училиштето велат дека забележале оти учениците јадат повеќе овошје и дека почесто носат вода со себе. Исто така, многу повеќе се фокусирани на часовите од порано.

„И понатаму ќе се продолжи со едукација на учениците, како дел од превентивната програма и тоа преку здравствена едукација на часовите и на седниците на ученичкиот совет, каде што ќе се зборува за негативните последици од консумирањето енергетски пијалаци, а ќе се понуди поздрава алтернатива. Тоа е основна цел на училиштето – едукација и промоција на здрав начин на живот“, велат од основното училиште „Каштањер“ во Пула.

Автор: Јосипа Фаркаш

Извор