Основното училиште „Фра Дидак Бунтиќ“ во градот Читлук (Босна и Херцеговина) донесе историска одлука за целосна забрана за внесување мобилни телефони и други дигитални уреди во училишните простории. Одлуката е донесена едногласно од страна на училишниот одбор, по предлог на наставниците и во тесна соработка со родителите.

Забраната стапува во сила на 4 мај 2026 година и ги опфаќа сите ученици. Единствен исклучок се децата што мора да поседуваат телефон поради дијагностицирани здравствени состојби, за што е потребна официјална потврда од здравствена установа.

Покрај телефоните, нови правила и за изгледот

Со цел да се зачува угледот на институцијата и да се заштити детската природа, училиштето воведе и дополнителни измени во Куќниот ред. На учениците отсега им се забранува:

• Шминкање, лакирање нокти и фарбање на косата.
• Несоодветна облека: забранета е претесна и непристојна облека која не му доликува на основно училиште.
• Енергетски пијалаци и цигари: строга забрана за внесување алкохол, енергетски сокови, како и обични и електронски цигари.

Зошто се воведуваат овие строги мерки?

Управата на училиштето смета дека дигиталните содржини и предвременото „возрасно“ однесување им ги крадат најубавите денови на децата. Целта е да се поттикне вистинско дружење и разговор меѓу учениците.

-Сакаме децата да останат деца што е можно подолго – здрави, опуштени и неоптоварени со дигиталниот свет. Нашата мисија е тие да растат во здрава и социјално прифатлива средина – порачуваат од училиштето во Читлук.

Оваа иницијатива веќе предизвика позитивни реакции во целиот регион, како пример за тоа како образовните установи можат да преземат одговорност во дигиталната ера.

Извор