Љубезноста значи да ја задржиш вратата за тој зад тебе, да се поздравиш кога ќе влезеш во продавница, да го прегрнеш синот кога ќе направи грешка, да ја прашаш сопругата како се чувствува…

Се чини дека денес повеќе од кога било ни е потребна љубезност надвор од домот, но и во домот. Особено дома, каде што се чувствуваме опуштено и полесно го покажуваме своето лошо расположение. Секојдневието е главно безмилосно кон нашата благосостојба, па затоа е многу важно да бидеме љубезни кон луѓето кои ни значат најмногу. Еднаквата распределба на работата, иако е можна, навистина е ретка, особено за време на бременоста и раните денови на родителството, кога мајката презема најголем дел од товарот. И тогаш љубезноста е најпотребна.

Бременост, породување, доење, сето тоа и еден куп други „практични и непрактични“ ситници кои доаѓаат со тоа – не е лесно. Во тие чувствителни моменти, добрината носи многу и ја зајакнува врската – и родителска и партнерска.

Една стара поговорка вели – среќата се множи со делење…

Те сакам!

Тие два мали збора со најголемо значење на светот ќе бидат нешто посебно кога ќе ѝ ги шепнете на увото на мајката додека таа го ниша вашето бебе. Или кога само ќе ѝ пратите порака среде бел ден. Вистината е дека сите сакаме да слушаме дека сме сакани.

Ти благодарам!

Иако се подразбира дека грижата за бебето или домаќинството е работа која е еднакво поделена меѓу сопружниците, можеби е време да ѝ кажете „благодарам“ на вашата сопруга. Сигурно самата глетка на мајката како го храни вашето бебе ве исполнува со благодарност, па зошто да не ѝ шепнете „благодарам“ на уво.

Дали ти треба помош?

Иако понекогаш не изгледа така, не е лесно да се биде мајка, па и да се грижи за себе, а и за сè што е поврзано со бебето. А тоа значи дека не е лесно да се храни и преслекува бебето секој ден, да се теши и да се масира стомакот на бебето поради грчевите, а во исто време самата мајка да се тушира, да измие заби и да стави еден куп бебешка облека за перење. Прашајте ја сопругата дали ѝ треба помош, обидете се да препознаете за што ѝ треба помош, па наместо „ти треба помош?“, кажете: „ќе ти помогнам околу алиштата“ или „јас ќе го заспијам бебето, а ти одмори се“.

За што размислуваш?

Кога би го знаеле тоа едни за други, светот би бил многу поедноставен. Но, не можеме, па мораме да комуницираме. Светот на мајката се менува многу поинаку од оној на таткото, поради бременоста и породувањето. Прашајте ја за што размислува, оставете ја да ви се отвори и споделете ги нејзините грижи и радости. Не мора да сте добро начитани за да зборувате за работи кои секому му се случуваат секој ден.

Убава си!

Еден мал комплимент отвора многу врати, тоа сигурно веќе го знаете. Вашата сопруга е сигурно најубавата на светот, па зошто да не ѝ го кажувате тоа почесто! Таков мал знак на внимание ќе ја воодушеви новата, но и искусната мајка и ќе направи да се чувствува подобро.

Што сакаш да правиме вечерва?

Често се случува паровите да заборават на својата врска поради притисокот од секојдневниот живот. Излезете од рутината и прашајте ја што би сакала да прави вечерта. Можеби гледање филм и јадење пуканки, или можеби некаква друштвена игра, но ако не прашате, никогаш нема да знаете колку може да биде забавна секоја вечер. И за вас и за неа!

Ајде да одиме на прошетка!

Понекогаш не треба да бидете многу креативни кога станува збор за поминувањето време заедно. Едноставна прошетка низ градот или во блиската шума може да направи чуда за односот помеѓу мажот и жената. Ако успеете да ја вклучите и грижата за децата во таа комбинација, ќе биде одлично!

Јас ќе го направам тоа!

Во секое семејство постои непишан распоред за тоа кој е задолжен за што и кога што се прави. Свртете ги работите и направете нешто ново за вашата сопруга. Ако мајката била задолжена да ги носи децата на тренинг, заедно однесете ги децата и потоа седнете на сладолед. Или зафатете се со чистење на детските чевли извалкани од кал. На мајката ќе ѝ значи многу, а вие ќе бидете задоволни што сте направиле нешто добро.

Дали си добро?

Иако одговорот може да биде лош, никогаш нема да знаете ако не прашате. Заедно решете ги проблемите кои ве мачат и за кои не би знаеле доколку не сте прашале. Менталното и физичкото здравје се важни!

Остани в кревет да спиеш!

Ноќното хранење не е лесна работа. Оставете ја мајката да спие уште неколку минути. Нека почувствува дека го цените тоа!

Науката за љубезноста вели дека окситоцинот е одговорен за среќата и задоволството што го чувствуваме правејќи добри работи. Хормонот на љубезност на задниот лобус на нашата хипофиза е исто така во својот врв кога жената станува мајка – за време на породувањето, почетокот на доењето и поврзувањето со бебето. Заедно со него доаѓа и допаминот, хормон кој создава чувство на еуфорија. За жал, тој ефект на добро чувство не е постојан.

Трикот е да се повторува љубезноста и малите знаци на љубезност во текот на денот за долгорочно добро чувство. И каде би било најдоброто место за да започнете да се чувствувате добро ако тоа не е дома?

Извор