Кон крајот на 2024 година Истражувачкиот центар „Пју“ го објави своето најново истражување спроведено на американски тинејџери на возраст од 13 до 17 години, кое покажало дека и покрај постојаната загриженост за влијанието на социјалните мрежи врз менталното здравје на тинејџерите и различните ограничувања, тинејџерите продолжуваат да ја користат технологијата речиси исто како и претходно.

Речиси половина од нив велат дека се онлајн „постојано“.
Иако секојдневната употреба на популарните социјални платформи како „Јутјуб“, „Тик-ток“ и „Снепчет“ е малку намалена во споредба со 2023 година, повеќето тинејџери сè уште го користат „Јутјуб“ секојдневно (90%), по што следува „Тик-ток“ (63%), а многумина исто така секојдневно ги проверуваат „Инстаграм“ или „Снепчет“.

Јасно е дека технологијата и социјалните медиуми ќе продолжат да играат значајна улога во животот на тинејџерите во 2025 година. Наместо да наметнуваат ограничувања, на тинејџерите ќе им треба поддршка во градењето здрав однос со технологијата. Ова се трите клучни технолошки трендови и совети кои можат да ви помогнат со нив.

Доминација на „Јутјуб“

„Јутјуб“ останува најпопуларната социјална платформа меѓу тинејџерите. Иако „Тик-ток“ и „Инстаграм“ се користат за кратки видеа, забележлив е тренд на подолги видеа на „Јутјуб“ каде што тинејџерите имаат и забава и образование.

Американската психолошка асоцијација ја нагласува важноста на улогата на возрасните во водењето на тинејџерите при консумирање видеосодржини. Некои клучни совети вклучуваат:

-Ограничете ја изложеноста на штетни содржини како насилство или ризично однесување.
-Поттикнувајте изложеност на позитивна содржина која промовира љубезност и благосостојба.
-Помогнете им на тинејџерите да најдат точни здравствени информации.
-Насочете ги кон содржини кои моделираат здрави врски.
-Следете го влијанието на онлајн влијателите и погрижете се тинејџерите да го разберат нивното влијание врз самодовербата.
-Управувајте со времето поминато на екранот со поттикнување офлајн активности.

Подемот на вештачката интелигенција (ВИ)

ВИ ќе биде составен дел од повеќето платформи што ги користат тинејџерите во 2025 година, од „Јутјуб“ до „Тик-ток“. Како што тинејџерите сè повеќе комуницираат со вештачката интелигенција, од клучно значење е тие да разберат како функционира и да ги препознаат потенцијалните ризици.

Еве како можете да им помогнете на тинејџерите снаодливо да користат вештачка интелигенција:

-Научете ги да проверуваат дезинформации генерирани од вештачката интелигенција.
-Објаснете им како вештачката интелигенција ја персонализира содржината, врз основа на нивните податоци и преференции и како тоа може да ја ограничи нивната изложеност на различни содржини.
-Поттикнете ги да бидат свесни за приватноста на податоците и како да управуваат со поставките за приватност.
-Едуцирајте ги за етичката употреба на вештачката интелигенција, особено во креативните индустрии.
-Предупредувајте ги на ризиците од потпирање на вештачката интелигенција за емоционална поддршка, наместо на вистински човечки односи.

Еволуцијата на социјалните мрежи

Социјалните мрежи сè повеќе стануваат фокусирани на забава и образование, а помалку на лични врски. Многу тинејџери сега користат платформи како „Тик-ток“ и „Јутјуб“ како пребарувачи, честопати заобиколувајќи ги традиционалните пребарувачи како „Гугл“.

Сепак, содржината генерирана од корисниците може да шири дезинформации, особено во врска со здравствените теми. Тинејџерите исто така купуваат, се занимаваат со брендови и истражуваат креативна содржина на платформи како „Инстаграм“ и „Пинтерест“. Бидејќи „Тик-ток“ се соочува со можни забрани, родителите треба да разговараат за промените на социјалните медиуми:

-разговарајте за прашањата за приватност и национална безбедност, особено во врска со „Тик-ток“
-прашајте ги тинејџерите како бараат информации на интернет и кои платформи ги користат
-зборувајте за целта на секоја платформа што ја користат, можеби ќе се изненадите.

За родителите што имаат тешкотии да бидат во тек со овие трендови, образованието за дигитална писменост во училиштата е клучно решение. Многу училишта почнаа да ја интегрираат дигиталната писменост во нивната наставна програма, но има уште многу работа. Учењето на тинејџерите како безбедно и одговорно да ја користат технологијата – е клучно за нивната успешна навигација во иднина.

Автор: Томислав Станиќ

Извор