За време на адолесценцијата, родителите и тинејџерите често се соочуваат со комуникациски предизвици. Во овој период младите се развиваат и го бараат својот идентитет, што може да резултира со тешкотии во изразувањето на чувствата. Дополнително, одредени прашања од родителите можат да бидат и причина за лошата комуникација. Едукаторката за воспитување Кејти Планкет на платформата „Инстаграм“ открила кои прашања најмногу ги мразат тинејџерите:
„На кој факултет ќе се запишеш?“
Прашувањето на тинејџерите каде планираат да одат на факултет може ненамерно да создаде притисок и да поттикне вознемиреност за нивната иднина и одлуки.
-Исто така, се нагласува дека ова е единствениот пат до успехот, игнорирајќи ги другите валидни кариери и животни опции што би можеле да ги разгледаат – забележала таа во својата објава.
„Дали имаш момче/девојка?“
Планкет тврди дека ова прашање може да предизвика непријатност, особено ако тинејџерите сè уште не се подготвени да го споделат одговорот. Тоа, исто така, имплицира дека родителите очекуваат тинејџерите да бидат во врска која можеби не е во согласност со нивните моментални приоритети или истражување на идентитетот.
„Ќе излегуваш така облечен?“
-Ова прашање може да се смета за осудувачко и потенцијално може да ја повреди самодовербата на вашиот тинејџер – вели Планкет.
Покрај тоа, тоа може да имплицира и неодобрување на нивниот моден избор или изглед на телото, што доведува до чувство на несигурност и конфликт.
Важно е да се поставуваат отворени прашања бидејќи тинејџерите подобро одговараат на нив, затоа што можат да ги споделат своите емоции и искуства. Создавањето позитивна средина која промовира отворен дијалог е од суштинско значење бидејќи поттикнува самоизразување и меѓусебно разбирање.
– Сè поголемата потреба на тинејџерите за приватност и независност е природна. Кога вашиот тинејџер бара осаменост, запомнете дека тоа обично не е лично насочено кон вас. Почитувајте го нивниот простор и уверете ги дека сте тука за нив. Разговарајте помалку, слушајте повеќе – на тој начин се поврзувате со тинејџерите – заклучила Планкет.
912