Со оглед на тоа дека се наближува јуни, а со тоа и матурската вечер, матурантите полека се подготвуваат за тој важен настан. Освен фустан, фризура и шминка, некои тинејџери можеби ќе сакаат и совршена насмевка и ќе бараат од родителите да им дозволат да ги избелат забите. И родителот ќе биде во дилема – дали да му дозволи?

На ова прашање одговара д-р Дубравка Јовановиќ, специјалист по орална хирургија.

– Хидроген пероксидот се наоѓа во нашата средина и има своја индустриска примена. Освен што е производ на метаболизмот на нашето тело и има примена во индустријата, се користи и во стоматологијата за избелување на забите. Она што долго време е мистерија е дали тинејџерите смеат да ги избелат забите и доколку е така, која техника е најпогодна за нив.

Знаеме дека овој период на растење е најчувствителен, па физичкиот изглед, вклучувајќи го и изгледот на забите, често е високо на листата со приоритети за тинејџерите. Она што најчесто им пречи, покрај распоредот на забите, е бојата на забите. Ова ги става родителите во дилема дали да им дозволат на своите тинејџери да се подложат на ваков вид стоматолошки третман.

Што се однесува до старосната граница, тоа е 15 години.

Зошто не порано?

Мора да се земе предвид дека вториот катник излегува на возраст од 12-13 години и во следните две години минерализацијата на глеѓта и растот на коренот се целосно завршени. Покрај развојот на самиот заб, важен е и развојот на мекото ткиво што го опкружува забот, така што третманот со избелување пред да бидат доволно зрели меките и тврдите забни ткива би довел до пречувствителност на забите или нивно оштетување.

Каков е резултатот и колку долго ќе трае избелувањето на забите?

Резултатот е посветла боја на забите за 2-3 нијанси. Времетраењето на резултатите од избелувањето е една до две години, и индивидуално зависи од животните навики и одржувањето на оралната хигиена.

Дали постојат ситуации кога не се препорачува белеење?

Како и со секоја интервенција, постојат ситуации кога белеењето на забите не треба да се направи, и тоа:

• Ако пациентот е помал од 15 години;
• Ако има скршени заби, кариозни лезии на забите или несоодветни пломби низ кои би навлегло белилото и би предизвикало болка и чувствителност;
• Лоша орална хигиена – присуство на меки и тврди наслаги на забите;
• Доколку постои општа чувствителност на забите на студ, топлина или кисело;
• Алергија на винил;
• Пречувствителност на хидроген;
• Дишење на уста;
• Метаболичко нарушување.

Што треба да знаат родителите?

Пред да одобрите ваков вид стоматолошки третман, треба да разговарате со вашето дете за тоа какви очекувања има за белеење на забите, за по третманот да нема момент на разочарување предизвикано од преголеми очекувања.

Автор: д-р Дубравка Јовановиќ
Извор