Секоја година во овој период кај родителите на идните првачиња се јавува истата дилема: „Дали моето дете знае доволно за да тргне во училиште?“ Честопати фокусот паѓа на познавањето на буквите и бројките. Но, како наставник кој секојдневно ги пречекува овие мали луѓе во училницата, ќе ви откријам една тајна: буквите се учат, но вештините за самостојност се градат дома.

Еве 5 клучни нешта што му се попотребни на едно прваче од совршен ракопис:

1. Самостојност во основните потреби: Наставникот во училницата е еден, а децата се многу. Голема помош за детето (и за нас) е ако тоа знае самостојно да си ги врзе врвките на патиките, да ја закопча јакната и правилно да ги спакува своите нешта во ранецот. Овие мали победи му даваат на детето огромна самодоверба.

2. Социјална и емоционална подготвеност: Училиштето е заедница. Важно е детето да знае како да побара помош, како да сподели молив со другарчето и како да се справи со фактот дека не може секогаш да биде прво. „Ве молам“ и „благодарам“ во училницата отвораат многу врати.

3. Следење едноставни инструкции: Во училиштето децата се среќаваат со правила. Дома вежбајте преку игра: задајте му на детето две или три задачи одеднаш (на пр. „Остави ги играчките, измиј ги рацете и дојди да јадеме“). Ова му помага на мозокот да се навикне на училишниот ритам.

4. Користење прибор (фина моторика): Пред да почнеме да ги пишуваме буквите, прстињата мора да бидат силни. Дозволете му на детето дома да сече со ножички (заоблени), да бои во рамки, да меси пластелин или да реди лего-коцки. Силните прсти значат полесно учење на ракописот подоцна.

5. Љубопитност наместо страв: Наместо да го плашите детето со реченици како: „Сега ќе видиш кога ќе седиш мирен во клупа“, зборувајте за училиштето како за место на авантури. Најважното нешто што едно прваче треба да го понесе со себе е желбата за знаење, а не стравот од грешка.

Драги родители, не грижете се ако вашето дете сè уште не знае да ги чита сите букви. Тоа е наша работа – заедно да ги совладаме во училницата. Вашата работа е да му подадете рака и да му кажете дека училиштето е прекрасен нов почеток.

Автор: Теодора Шалевска, наставничка