Мајските тестирања често завршуваат со родителска паника. „Дали доволно знае?“, „Зошто психологот рече дека му попушта вниманието?“ Како наставник кој ги пречекува првачињата во училницата, сакам да ви откријам една голема вистина: Во септември за нас не е најважно дали детето знае да чита или да собира до 20.

Постојат неколку „невидливи“ вештини што наставникот веднаш ги забележува, а кои на детето му даваат самодоверба за успешен старт:

1. Трпението да се почека на ред: Во училницата вниманието на наставникот се дели на триесет ученици. Најголемиот предизвик за едно прваче не е задачата на таблата, туку моментот кога треба да почека да дојде неговиот ред за да каже нешто или да добие одговор. Летово вежбајте го ова низ најобични ситуации: во продавница, на игралиштето пред лулашките или низ друштвени игри каде што секој има свој термин за потег. Детето што знае дека неговиот ред секако ќе дојде, влегува во училницата со мир и трпение.

2. Вештината да се побара помош (гласно и јасно): Многу првачиња „заглавуваат“ во училницата не затоа што не знаат, туку затоа што се срамат да прашаат. Летово поттикнувајте го детето самостојно да праша за насока, да му се обрати на непознато другарче во паркот. Кога детето знае дека неговиот глас е важен и дека е во ред да каже: „Наставничке, не разбрав“, тоа веќе завршило половина од работата во прво одделение.

3. Самостојност во грижата за својот прибор: Честопати првачињата се збунети не од задачата, туку од хаосот во сопствениот ранец. Вежбајте низ игра како самостојно да го извади својот блок, како да го затвори капачето на фломастерот за да не се исуши и како да си ги подреди моливчињата во несесерот. Оваа мала организација му дава на детето чувство на контрола и сигурност дека може самото.

4. Истрајност наместо страв од грешка: Ако на тестирањето ви рекле дека вниманието му е кратко, вежбајте ја „завршноста“ дома. Што и да започнете – редење сложувалка или средување на играчките – научете го детето да ја заврши активноста докрај пред да почне нешто ново. Уште поважно, научете го дека во училиште е во ред да се згреши. Детето што не се плаши од грешка е дете кое учи со радост.

Летото е за одмор и за градење на емоционалната сигурност. Наставната програма ве очекува во септември, а вашето дете има потреба само од вашата поддршка и љубопитност.

Автор: Теодора Шалевска, наставничка