Како правилно и безболно да станете од кревет по царски рез
По царски рез, на некои жени им е потребно помалку, а на некои повеќе време за целосно да закрепнат. Многу работи зависат од начинот на кој е изведена самата операција, но и од тоа како мајката го минува овој прв и најважен период од заздравувањето.
Со оглед на тоа што станува збор за хируршка интервенција, жената истовремено заздравува и од бременоста и од самиот оперативен зафат. Поради тоа, исклучително е важно да му помогне на своето тело со соодветен одмор, правилна нега на раната и соодветна исхрана.
Сепак, еден од клучните елементи за полесно секојдневно функционирање и побрзо закрепнување е начинот на кој станувате од кревет.
Еве практични совети како правилно и најлесно да станете од легната положба, без непотребен притисок врз раната:
1. Свртете се настрана
Никогаш не обидувајте се да станете директно од грб нагоре бидејќи тоа создава огромен притисок врз стомачните мускули и свежата рана. Наместо тоа, прво свиткајте ги колената и полека свртете го целото тело настрана.
2. Спуштете ги нозете од креветот
Додека сè уште лежите настрана, доближете се до работ на креветот и полека спуштете ги двете нозе кон подот.
3. Потпрете се на рацете за да се исправите
Користејќи ги рацете и лактите како лост, полека туркајте се од душекот за да го подигнете горниот дел од телото во седечка положба. На овој начин целата тежина и напор ги преземаат рацете, а не стомачната мускулатура.
4. Седнете на работ од креветот
Пред да застанете на нозе, останете да седите на работ неколку секунди. Ова ќе спречи можна вртоглавица или пад на крвниот притисок.
5. Полека станете со исправен грб
Притиснете со стапалата на подот и со помош на мускулите на нозете (а не на стомакот) исправете се. За дополнителна стабилност и сигурност, со едната рака можете благо да го придржувате долниот дел од стомакот или да искористите перница како потпора.
