Деновиве ја запознав Исидора Мун. Таа е поинаква од другите деца, но не и помалку важна. Знаете, Исидора е и самовила и вампир. Ама тоа воопшто не е страшно. Ако некој досега ве плашел со самовили и вампири, Исидора сака да ни докаже дека и тие се суштества, но малку различни (како што сме различни и ние луѓето, едни од други) и што е поважно – добри се.

Ова самовилско-вампирско девојче има неразделно другарче што истовремено ѝ е милениче. Тоа е Розовото зајче, некогаш безживотна кукла, а денес верен другар. И нивната љубов е исто силна и обострана.
И додека Исидора е спокојна зашто не мора да оди на училиште како обичните деца со смешни униформи што секојдневно ги гледа од својата соба – мајка ѝ и татко ѝ ја потсетуваат дека дојде време таа да тргне во прво одделение. Хм… И сега, што ќе се прави? Па таа не е ни целосно самовила, ни комплетно вампир. Како ќе се приспособи на наставната програма?

Ако не проба – нема ни да знае.

Прв школски ден во училиштето за самовили. Се чини, распоредот на часовите е лесен, но не и за Исидора Мун. Не знае да ракува со волшебно стапче. Балетот е потежок во розово фустанче, а цветниот аранжман во венчето изгледа е малку отровен. Плус, печурките не се цвеќе  Исидора се чувствува како комплетен губитник. Но, можеби, пак, таа е повеќе вампирка и затоа не се снаоѓа сосема во самовилското училиште. Ќе треба да ја провери својата вампирска страна…
Се разбира, во вампирското училиште, часовите почнуваат навечер и траат речиси до пред зората. Прв час – вампирско летање. Ама Исидора заостанува, иако има преубави вампирски крилца. Следи припитомување и дресура на лилјаци. Повторно неуспех. Ајде, можеби на третиот час ќе се дотера како вистински вампир. Или можеби не?! А и кај се чуло-видело, вампир да заспие ноќе?! Е па, нашата Исидора не можеше да издржи. Заспа како бајче.
Мама-самовила и тато-вампир се загрижени, но се чини дека нема простор за паника.

А вие, што мислите дека се случи следно? Каде се пронајде Исидора? Зошто таа би морала да посетува вампирско или самовилско училиште, кога не е целосно ни вампирка ни самовила? Па таа, сепак, е дете ?

Сигурна сум дека ќе најдете милион причини за да ја обожавате Исидора Мун. Нејзиниот свет е светкав, розов и весел. Таа е многу умна и сака да се дружи. А мислам дека најмногу ќе ѝ се допадне кога ќе ги прочитате нејзините приказни и ќе ја прифатите за другарче.

Следниот пат ќе ви споделам некоја нова авантура на Исидора Мун, таа е полна со приказни. Впрочем, ќе ви споделам свое доживување од нејзина авантура. Но, со оглед на тоа што сечие доживување е единствено и нема второ исто, ве поттикнувам сами да бидете откривачи на магиите на книгите. Сфатете го тоа како игра, така најубаво се учи!