Родителството е прекрасно, но може да биде и напорно. Особено во денешното модерно време, родителите често се под стрес поради различни задачи кои вклучуваат балансирање на работата, други обврски и воспитување. Често се споредуваат со другите, што дополнително ги влошува нивните грижи. Сепак, мајките обично ги споредуваат своите методи на родителство со оние на другите мајки.
Тоа може да има негативно влијание врз нивното ментално здравје, но и врз нивните деца. Сакаат да бидат совршени мајки бидејќи го чувствуваат притисокот на општеството, а тука се појавува терминот „синдром на совршена мајка“. Психологот Ивана Кобер Врбат подетално го објаснува овој поим.
– Терминот „синдром на совршена мајка“ се појавува во некои популарни текстови, но како таков не пушти целосно корен во психологијата како наука и практика. Поедноставно, можеме да кажеме дека се работи за изразен перфекционизам кај мајките и желбата сѐ да биде „совршено“ – сѐ да прават беспрекорно, успешно да ги завршуваат сите задачи, да ги исполнуваат сите очекувања и никогаш да не грешат – открива психологот.
Ова може значително да влијае врз менталното здравје на мајките. Кобер Врбат објаснува дека луѓето што имаат изразен перфекционизам често се стремат кон совршенство и сакаат да исполнат високи критериуми, во овој случај, во мајчинството.
– Перфекционизмот често доаѓа со изразена анксиозност, ниска самодоверба, а понекогаш и депресија и нарушувања во исхраната, токму затоа што е невозможно да се исполнат толку високи критериуми. Перфекционизмот се обидува да нѐ убеди дека ќе вредиме само ако сме совршени – вели таа.
Тоа можат да бидат знаци кои укажуваат дека мајките страдаат од овој синдром.
На децата не им требаат совршени родители
Психологот нѐ потсетува дека на децата не им треба совршена мајка или совршени родители, туку родители кои се доволно добри и кои секогаш ќе бидат тука за нив.
-Првиот чекор е да станеме свесни дека општеството, а и самите нас често си поставуваме очекувања кои е невозможно да ги исполниме -вели Кобер Врбат.
Таа посочува дека е важно да се постават приоритети, а некои помалку важни работи да се испуштат и да се задоволиме со доволно добри решенија.
– Да се потсетиме дека имаме повеќе улоги во животот. Покрај тоа што сме мајки, ние сме и пријатели, сестри, шефови, менаџери, студенти итн. Исто така, секоја споредба, вистинска или виртуелна, е тивок крадец на нашето задоволство. Редовно се споредуваме со нереални прикази на мајчинството на социјалните мрежи, па големи се шансите да бидеме незадоволни од родителството – додала таа.
Забележува дека, пред сè, е важно да ги намалиме очекувањата што ги имаме од себе, нашите деца или општеството.
Клучот не е да се споредувате со другите
-Истражувањето покажува дека изложеноста на содржини на социјалните мрежи е поврзана со пониска перцепција за ефективноста на родителите – вели Кобер Врбат.
Таа објаснува дека тоа значи дека колку повеќе се споредуваме со другите мајки на социјалните мрежи, толку повеќе ќе гледаме на себе како на неефикасни родители.
-Најважно за децата е да сме со нив, присутни во нивното време, без екрани кои ни го одвлекуваат вниманието, без да се жалиме на училишните оценки и слично – вели психологот.
Првиот чекор е да сфатиме дека имаме склоност кон перфекционизам и дека можеме да го промениме тоа за доброто на децата. Нашите деца треба да видат дека не сме совршени затоа што никој не е совршен и сосема е нормално да се прават грешки – истакнува Кобер Врбат. Во таква средина децата можат да растат неоптоварени и без страв дека ќе направат грешки.
-Накратко, да ги намалиме нашите очекувања, да не се споредуваме со другите и да бидеме нежни кон себе. Да покажеме сочувство кон себе – заклучила таа.
912